დეტალები: ტელეკომპანიის ინფორმაციით, სოფელ ხაიშში ჟურნალისტ ემა გოგოხიასა და ოპერატორს კამერა, მიკროფონი, გადამცემი და პირადი ტელეფონი წაართვეს და სიტყვიერი შეურაცხყოფა მიაყენეს.

  • არხის ცნობით, შემთხვევა მაშინ მოხდა, როცა მედიის წარმომადგენლები ერთ-ერთ საამქროში უკანონოდ შემოჭრილი მორების კადრებს იღებდნენ.
  • ემა გოგოხია ტელეკომპანიასთან ჰყვება, რომ თავდამსხმელებმა ისინი ალყაში მოაქციეს და ემუქრებოდნენ.

მთავარ არხთან ჟურნალისტი ამბობს იმასაც, რომ თავს სავარაუდოდ, 12 ადამიანი დაესხნენ და მათ შორის იყვნენ ისინიც, ვინც წარსულში მათ ხის ჭრის თემის გადაღებისას დაუპირისპირდნენ.

  • "მაშინ პოლიციამ გამოავლინა ეს პირები, მაგრამ არანაირი რეაგირება არ მოჰყოლია. დღეს ისინი თავს მეორედ დაგვესხნენ. ოპერატორი კარებთან მიამწყვდიეს და კამერა წაართვეს ხელიდან, მიკროფონი და ტელეფონი წამართვეს ასევე გადამცემი", — ამბობს ის.
  • როგორც ემა გოგოხია ჰყვება, მას შემდეგ, რაც თავდამსხმელებმა გაიგეს, რომ გადამღებმა ჯგუფმა პოლიცია გამოიძახა, ტექნიკა იმ პირობით დაუბრუნეს, რომ მასალას წაშლიდნენ.
  • "შემდეგ ოპერატორს დაემუქრნენ, რომ თუ მასალას გავუშვებდით საქმეს გაგვირჩევდნენ", — ამბობს ის.