ამის შესახებ მერაბ გაფრინდაშვილმა მედიასთან ისაუბრა.

გეოლოგის განმარტებით, შოვის ტერიტორიაზე ადგილი ჰქონდა გეოლოგიური და ჰიდროელექტროლოგიური მოვლენების სინერგიას, რაც ერთსა და იგივე დროს, ერთსა და იმავე ლოკაციას თანხვედრას გულისხმობს.

• "კერძოდ, მიმდინარეობს მყინვარის ინტენსიური დნობა, ორი მყინვარია ამ მდინარის სათავეებში — მყინვარი თბილისა და ბუბა, ამას თან დაერთო უხვი ატმოსფერული ნალექი. ამ უხვმა ნალექმა, ამ წყლის ნაკადმა დინამიკაში მოიყვანა როგორც ხეობაში არსებული მყარი ნატანი, ასევე ადგილი ჰქონდა ნაპირების გარეცხვას და ე.წ. სანაპირო ტიპის მეწყრული პროცესების ჩასახვა-გააქტიურებას. ყველაფერი ეს ღვარცოფში გადაიზარდა და შედეგად მივიღეთ ის, რაც თქვენთვის ცნობილია", — ამბობს ის.

დეტალები: მერაბ გაფრინდაშვილი ამბობს, რომ ადგილზე ჰიდროლოგთა და გეოლოგთა 6 ჯგუფი მუშაობს და ვიზუალურ დათვალიერებასთან ერთად, ინსტრუმენტალური მონიტორინგიც მიმდინარეობს.

• გეოლოგი დარწმუნებით ამბობს, სიტუაცია შედარებით დასტაბილურდა, მიმდინარეობს კვლევები და მსგავსი მასშტაბის სტიქია, ამ ეტაპზე, მოსალოდნელი არ არის.
• "სტიქია რომელიც გუშინ ამ ლოკაციაზე განვითარდა, სრულად დაკავშირებულია ბუნებრივ ფაქტორებთან — რთული მორფოლოგიური და გეოლოგიური პირობები და ის პროცესები, რომლებიც ამ რთულ რეგიონს თავს დაატყდა. ამ ეტაპზე, განმეორების საფრთხე არ არსებობს".
• მისივე თქმით, დასავლეთ საქართველოში მსგავსს სტიქიას ადგილი არასოდეს ჰქონია, არა მარტო ამ ხეობაში.
• "თუ არ ჩავთვლით 1991 წლის 29 აპრილის მიწისძვრას, რაჭა-იმერეთის ზონაში, სადაც ერთ-ერთი სოფელი ჩაიმარხა".
• გაფრინდაშვილის განცხადებით, ვარაუდობენ, რომ 5 მილიონზე მეტი კუბური მეტრი მყარი მასა მოვიდა დინამიკაში.
• კითხვაზე, შესაძლებელი იყო თუ არა ტრაგედიის არიდება, გეოლოგი ამბობს, რომ მსგავსი მასშტაბურობისა და კომპლექსურობის სტიქიის პროგნოზირების პრეცედენტი არ არსებობს.

ბოლო ცნობები: ამ დროისთვის შინაგან საქმეთა სამინისტროს ოფიციალურად 6 ცხედარის აღმოჩენა აქვს დადასტურებული.

• რამდენიმე წუთის წინ გავრცელდა ინფორმაცია, რომ ადგილობრივებმა ახალგაზრდა ქალის ცხედარი მდინარე ჭანჭახის კაკაპოტში იპოვეს — მაშველებმა ის სასაზღვრო პოლიციის ვერტმფრენის დახმარებით ამოიყვანეს.

• მთავრობის ადმინისტრაციამ გაავრცელა კადრები იმის საჩვენებლად, რომ ირაკლი ღარიბაშვილი ონში ჩავიდა,იქ ასევე, იმყოფებოდა შალვა პაპუაშვილი. ისინი საგანგებოს შტაბის წევრებს შეხვდნენ.

• თუმცა შემდეგ მედიების მიერ გავრცელებულ კადრებში ვხედავთ, თუ როგორ ტოვებს ღარიბაშვილი ტერიტორიას ყველანაირი კომენტარის გარეშე.

• შოვში მომხდარ სტიქიაზე ბოლო ცნობები განახლებულ რეჟიმში შეგიძლიათ იხილოთ აქ.