რატომ არის მნიშვნელოვანი: 11-12 ივლისს, ვილნიუსში ნატოს სამიტი იმართება, რომელშიც უკრაინის ლიდერი, ვოლოდიმირ ზელენსკიც მონაწილეობს, მისი საკვანძო საკითხი კი უკრაინის ალიანსში გაწევრიანებაა.

• ალიანსის წევრი სახელმწიფოები ომში მყოფი უკრაინის დახმარებასა და უსაფრთხოების გარანტიებზე მსჯელობენ, ასევე, განიხილავენ ქვეყნის გზას NATO-ს წევრობისკენ.
• უკრაინის საგარეო საქმეთა მინისტრმა, დმიტრო კულებამ 10 ივლისს განაცხადა, რომ შეთანხმება მიღწეულია და NATO-მ გადაწყვიტა, უკრაინა ალიანსში MAP-ის გარეშე მიიღოს.
• მიუხედავად ამისა, სამიტის დაწყების წინ ზელენსკიმ ალიანსი გააკრიტიკა — მისი თქმით, უკმაყოფილოა მიღებული სიგნალებით, რომ არ არსებობს მზადყოფნა, უკრაინა NATO-ს წევრი გახდეს.
• გუშინ ვილნიუსში სამიტზე დასასწრებად ჩავიდა საქართველოს საგარეო საქმეთა მინისტრი, ილია დარჩიაშვილი.
• სამიტში არც საქართველოს პრეზიდენტი და არც პრემიერმინისტრი მონაწილეობენ.

უკრაინაზე ნატოს ლიდერები შეთანხმდნენ, რომ "ქვეყნის მომავალი NATO-შია".

• ეს სიტყვები ნათქვამია ალიანსის სამიტის კომუნიკეშიც, სადაც ასევე, საუბარი იმაზე, რომ უკრაინის ევროატლანტიკური ინტეგრაცია გასცდა წევრობის სამოქმედო გეგმის ქონის საჭიროებას.
• თუმცა უარი თქვეს, კიევის ოფიციალურ მოწვევაზე ან გაწევრიანების კონკრეტული თარიღის დასახელებაზე.

საქართველოზე კომუნიკეში გაკეთებული ჩანაწერით კიდევ ერთხელაა ხაზგასმული, რომ ნატო მხარს უჭერს ქვეყნის სუვერენიტეტს მაგრამ ალიანსთან დაახლოების გზაზე რეფორმების გატარებაა საჭირო.

• ნათქვამია, რომ ალიანსი მხარს უჭერს საქართველოს ტერიტორიულ მთლიანობას და ქვეყნის უფლებას, გადაწყვიტოს საკუთარი მომავალი და საგარეო პოლიტიკური კურსი გარე ჩარევების გარეშე.
• ასევე, მოუწოდებენ რუსეთს, გაიყვანოს ძალები საქართელოდან და ასევე, გადახედოს აფხაზეთისა და სამხრეთ ოსეთის აღიარების საკითხს.
• გარდა ამისა, დოკუმენტში აღნიშნულია საქართველოს შეიარაღებული ძალების წვლილი საერთაშორისო მისიებში.
• თუმცა, უკრაინისგან განსხვავებით, ნათქვამია, რომ MAP ნატოში გაწევრიანების გზაზე განუყოფელი ნაწილი იქნება.

შეფასებები: საქართველოს საგარეო საქმეთა სამინისტროს განცხადებით, ქართული მხარე მიესალმება სამიტის დასკვნით დოკუმენტში გამოხატულ მხარდაჭერას.

• "საქართველოსთვის უაღრესად მნიშვნელოვანია სამიტზე წევრი ქვეყნების მიერ დადასტურებული მზაობა, რათა გაგრძელდეს მუშაობა ბუქარესტის სამიტზე მიღებული გადაწყვეტილების, რომ საქართველო გახდება ნატო-ს წევრი, განხორციელების მიმართულებით".
• კობახიძემ კი საზოგადოებოებრივი მაუწყებლის ეთერში თქვა, რომ საქართველოსთვის მუდმივი რისკია ნატოსა და საქართველოს შორის არსებული მდგომარეობის დიდი ხნით გაგრძელება.
• "უკრაინის მაგალითზე ეს ვნახეთ, დიდი ხანი კარში დგომა იწვევს მძიმე შედეგებს", — ამბობს ის.
• ამ შინაარსის პოსტი გამოაქვეყნა 10 ივლისს შალვა პაპუაშვილმა და NATO გააკრიტიკა.
• აშშ-ის ყოფილი ელჩი საქართველოში, იან კელი ვილნიუში მიმდინარე სამიტს ასე გამოეხმაურა:
• "დაკარგული შესაძლებლობაა, რომ საქართველოდან არ ესწრება არც პრეზიდენტი და არც პრემიერი. მაშინ, როცა ქართველების უმრავლესობა მხარს უჭერს ნატოში გაწევრიანებას, მათმა მთავრობამ ქვეყანა განხილვის მიღმა დატოვა".