MAP ჩრდილოატლანტიკურ ალიანსში გაწევრიანების სამოქმედო გეგმაა, რომელიც მსურველ ქვეყნებს ეხმარება, შესაძლო წევრობისთვის მოემზადოს.

  • დროში გაწერილი რეფორმების გეგმის შესრულების შემთხვევაში და NATO-ს წევრი ქვეყნების პოლიტიკური გადაწყვეტილების საფუძველზე ქვეყანა ალიანსში გაწევრიანდება.
  • ის პოლიტიკურ, ეკონომიკურ, თავდაცვის, უსაფრთხოებისა და სამართლის ასპექტებს მოიცავს.

დეტალები: უკრაინის საგარეო საქმეთა მინისტრის, დმიტრო კულებას განცხადებით, შეთანხმება მიღწეულია და NATO-მ გადაწყვიტა, უკრაინა ალიანსში MAP-ის გარეშე გაწევრიანდეს.

  • მისივე შეფასებით, ეს ნაბიჯი ქვეყნის NATO-ში გაწევრიანების გზას დაამოკლებს.
  • კულებამ აღნიშნა, რომ ეს გადაწყვეტილება ინტენსიური მოლაპარაკებების შედეგად იქნა მიღწეული.
  • "მივესალმები ამ დიდი ხნის ნანატრ გადაწყვეტილებას", — დაწერა მან.
  • ჯერჯერობით NATO-ში ოფიციალური კომენტარი არ გაუკეთებიათ.

NATO-ს სამიტი ვილნიუსში 11-12 ივლისს გაიმართება და მასში მონაწილეობას უკრაინის პრეზიდენტი, ვოლოდიმირ ზელენსკიც მიიღებს.

  • როგორც სტოლტენბერგი აცხადებს, სამიტზე მოკავშირეები უკრაინის საკითხზე გადაწყვეტილებებს მიიღებენ.
  • ასევე, განიხილავენ ქვეყნის გზას NATO-ს წევრობისკენ.
  • გუშინ აშშ-ის პრეზიდენტმა, ჯო ბაიდენმა CNN-თან ინტერვიუში თქვა, რომ უკრაინა ჯერ ალიანსში გაწევრიანებისთვის მზად არ არის და NATO-მ ქვეყნის დამატება თავის რიგებში მას შემდეგ უნდა განიხილოს, რაც იქ რუსეთის ომი დასრულდება.