რა მოხდა: ინფორმაცია, რომ მიტროპოლიტი და პატრიარქის მოსაყდრე შიო მუჯირი მოწამლეს, მთავარმა არხმა და რუსთავი 2-მა გაავრცელეს.

  • 5 ივლისს თეოლოგი, ლევან ტატურაშვილი მედიასთან ამბობდა, რომ მეუფე შიომ მსახურების შემდეგ თავი შეუძლოდ იგრძნო, მიმართა ექიმებს, ჩაუტარდა გამოკვლევა და სისხლში დარიშხანი აღმოაჩნდა.
  • მისივე თქმით, სახელმწიფომ და საპატრიარქომ გადაწყვიტეს, რომ ეს ამბავი დაფარული და გასაიდუმლოებული ყოფილიყო.
  • ტატურაშვილის განცხადებით, შეამოწმეს მეუფის პირადი ნივთები და მისი მოწამვლის ადგილმდებარეობა დადგინდა.
  • "მე მაქვს ინფორმაცია, რომ ეს იყო სამების საკათედრო ტაძრის საკურთხეველი და დღეს უკვე არავინ მალავს ინფორმაციას, რომ მოსაყდრე შიო მოწამლულია", — თქვა მან.

გარდა ამისა, რუსთავის 2-ის დღეს გავრცელებულ ინფორმაციაში საუბარია იმაზე, რომ ბოლო თვის განმავლობაში მეუფე შიო მართლაც შეუძლოდ გრძნობდა თავს, განსაკუთრებით მძიმედ კი ერთი კვირის წინ იყო.

  • ასევე, ამბობენ, რომ აქვთ "უტყუარი ინფორმაცია," რომ კვლევების შედეგად ანალიზებში არაერთი საეჭვო ნივთიერება აღმოჩნდა.
  • "ჩვენი ინფორმაციით, საპატრიარქოში ეჭვობენ, რომ დროთა პატრიარქის თანამოსაყდრეს დროთა განმავლობაში, ეტაპობრივად წამლავდნენ".

რას ამბობს საპატრიარქო: საზოგადოებასთან ურთიერთობის სამსახურის ხელმძღვანელმა, ანდრია ჯაღმაიძემ დაადასტურა, რომ მეუფე შიოს სისხლის ანალიზში მართლაც აღმოჩნდა მძიმე მეტალების დასაშვებზე მაღალი რაოდენობა.

  • ამიტომ, მისივე თქმით, პატრიარქის მოსაყდრის მოწამვლას, "შესაძლოა, ჰქონდეს ნაწილობრივი საფუძველი".
  • "ჩვენ გვაქვს ფაქტი, რომ მეუფე შიოს სისხლის ანალიზში არის გარკვეული ცვლილებები, აღმოჩნდა მძიმე მეტალების დაშვებულზე უფრო მეტი შემცველობა. სხვა დაზუსტებით რაიმეს თქმა დღეისთვის რთულია", — ამბობს ჯაღმაიძე.
  • ის არ გამორიცხავს, რომ შიო მუჯირის ავადმყოფობა ვინმეს ინტერესში იყოს.
  • "ორი სხვადასხვა მოსაზრება არსებობს. შეიძლება, იყოს ყოფითი რაიმე შემთხვევა, თუმცა არ არის გამორიცხული, იყოს ჩარევაც და, როგორც თქვეს, შესაძლოა, ვიღაცის ინტერესში იყოს მისი ავადმყოფობა".
  • ჯაღმაიძის ინფორმაციით, რომ მეუფის მდგომარეობა ამ ეტაპზე ნორმალურია და სამუშაო პროცესშიც ჩართულია.
  • მისივე თქმით, გამოძიებისთვის საპატრიარქოს ჯერ ოფიციალურად არ მიუმართავს.