სოციალურ მედიაში გავრცელებულ კადრებში ჩანს, რომ კრემლის თავზე უცნობი ობიექტი აფეთქდა.

რატომ არის მნიშვნელოვანი: ოკუპანტი ქვეყანა ირწმუნება, რომ ჩამოაგდო ორი უპილოტო თვითმფრინავი, რომლებიც წუხელ მოსკოვში კრემლს დაუმიზნეს.

  • კრემლში განაცხადეს, რომ მომხდარს რუსეთის პრეზიდენტის ვლადიმერ პუტინის სიცოცხლის მოსპობის მცდელობად მიიჩნევენ.
  • "წუხელ კიევის რეჟიმმა სცადა უპილოტო საფრენი აპარატებით დარტყმა მიეტანა რუსეთის ფედერაციის პრეზიდენტის კრემლის რეზიდენციაზე", — აცხადებს კრემლი და საპასუხო ზომების მიღებას აანონსებს.
  • პუტინის სპიკერის განცხადებით, რუსეთი პრეზიდენტი აფეთქების დროს ადგილზე არ იმყოფებოდა. კრემლში აცხადებენ, რომ თვითმფრინავების ფრაგმენტები შენობას დაეცა, მაგრამ არავინ დაშავებულა და შენობები არ დაზიანებულა.

დეტალები: ზელენსკის სპიკერმა განაცხადა, რომ უკრაინა ფოკუსირებულია საკუთარი ტერიტორიის გათავისუფლებაზე მას შემდეგ, რაც გასულ წელს რუსეთი ქვეყნის ტერიტორიაზე შეიჭრა.

  • BBC-ის წყარო ვარაუდობს, რომ რუსეთი უკრაინაში ახალ ფართომასშტაბიან ტერორისტულ პროვოკაციას ამზადებს და ინციდენტი მათივე ორგანიზებულია.
  • მედიაში ჩნდება ვარაუდი, რომ რუსეთის პრეზიდენტის მაღალი დაცვის პირობებში, დაუჯერებელია ფაქტი, რომ უცხო თვითმფრინავი კრემლის ტერიტორიაზე მოხვდა.
  • ბოლო პერიოდში რუსეთში აფეთქებები და ხანძრები გახშირდა.
  • ინციდენტში კიევის მონაწილეობას უარყოფენ უკრაინის ოფიციალური პირები.

კრემლი ყურადღებას ამახვილებს ფაქტზე, რომ რეზიდენციაზე თავდასხმა განხორციელდა "9 მაისის აღლუმის წინა დღეს, რომელზეც დაგეგმილია უცხოელი სტუმრების დასწრებაც".

  • თუმცა, ინციდენტი გავლენას არ მოახდენს კრემლის გეგმებზე — აღლუმი წითელ მოედანზე 9 მაისს გაიმართება, განუცხადა TASS-ს პრეზიდენტის პრესსპიკერმა დიმიტრი პესკოვმა.
  • მოსალოდნელია, რომ დღესასწაულებში მონაწილეობას პუტინიც მიიღებს.
  • ინციდენტის შემდეგ მოსკოვის მერმა, სერგეი სობიანინმა დედაქალაქში დრონების გაშვების აკრძალვა გამოაცხადა.