ამის შესახებ ინფორმაციას საქართველოს პროკურატურა ავრცელებს.

რატომ არის მნიშვნელოვან: 24 აპრილს სოციალურ ქსელში რენატა ბეგიაშვილმა გამოაქვეყნა პოსტი, სადაც შვილის მამის, შალვა იაშვილის მხრიდან ძალადობაზე ისაუბრა.

• პოსტს თან ერთვის ფოტოც, სადაც ჩანს, რომ ქალს ცალი თვალი დაზიანებული აქვს და კისერზეც აღენიშნება ძალადობის კვალი.
• "ბევრის მეგობარი, ორი შვილის მამა, თვითონაც შვილია ჰყავს და! ნეტა, როგორ მოიქცეოდა, თავად რომ ენახა მისი უახლოესი საყვარელი ქალი ესეთ მდგომარეობაში, რას მოიმოქმედებდა. ბევრი წელი ჩუმად ვიყავი", — წერს ის.
• მისი თქმით, ბევრი წლის განმავლობაში იყო ძალადობის მსხვერპლი, თუმცა დუმდა.
• "ისაა ფარული მოძალადე. საშიშია შვილისთვის, საზოგადოებისთვის! ძალიან ბევრი წელი დავკარგე და ძალიან ბევრი მოვითმინე შვილისთვის, მაგრამ ეს ბოლო წვეთია. ცრემლის ნაცვლად, თვალიდან სიხლი მდის", — წერს ის.

პოსტის გამოქვეყნების შემდეგ არაერთმა ადამიანმა მონიშნა სოციალურ ქსელში შინაგან საქმეთა სამინისტრო და მათ გამოძიების დაწყებისკენ მოუწოდა.

• შსს-მ გამოძიება სისხლის სამართლის კოდექსის 126-ე პრიმა მუხლით დაიწყო, რაც ოჯახში ძალადობას გულისხმობს.

დეტალები: უწყების ცნობით, მეუღლის მიმართ განხორციელებული ძალადობის ფაქტზე ერთ პირს ბრალდება წარუდგინა.

• მათი განცხადებით, 22 აპრილს, თბილისში ბრალდებულმა ურთიერთშელაპარაკების ნიადაგზე მეუღლეზე ფიზიკურად იძალადა, რა დროსაც სახის არეში დაზიანებები მიაყენა.
• განმარტავენ, რომ სამართალდამცველებმა დანაშაულის ჩამდენი პირი 25 აპრილს დააკავეს, მას ბრალდება საქართველოს სისხლის სამართლის კოდექსის 126 პრიმა მუხლის პირველი ნაწილით (ოჯახის ერთი წევრის მიერ ოჯახის სხვა წევრის მიმართ ძალადობა, რამაც ფიზიკური ტკივილი გამოიწვია) წარედგინა.
• პროკურატურა ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს.
• ამბობენ, რომ მსგავსი კატეგორიის დანაშაულებზე მკაცრ სისხლის სამართლის პოლიტიკას ატარებენ, რასაც მომავალშიც გააგრძელებენ.

მნიშვნელოვანია ვიცოდეთ, რომ ოჯახში ძალადობა არ გულისხმობს მხოლოდ ფიზიკურ შეხებას. ოჯახის წევრის მხრიდან ფსიქოლოგიური ზეწოლა, მუქარა, შანტაჟი, სიტყვიერი შეურაცხყოფა ასევე ძალადობაა და კანონით აკრძალულია.

• ოჯახში ძალადობის შემთხვევაში პოლიციის გამოძახება შესაძლებელია 112-ზე დარეკვით. ზარი უფასოა.
• საკონსულტაციო მომსახურების გაწევის მიზნით ფუნქციონირებს ცხელი ხაზი — 116 006.

საჭიროების შემთხვევაში შეგიძლიათ დარეკოთ შემდეგ ნომრებზე:

• საფარის უფასო იურიდიული დახმარება — 0322 30 76 03; 599 40 76 03;
• სახალხო დამცველის ცხელი ხაზი — 1481.