რატომ არის მნიშვნელოვანი: 2016 წლის ივლისს მთავრობის განკარგულება გამოიცა, რომელიც საქართველოს პირველი დემოკრატიული რესპუბლიკის მთავრობის მიერ საფრანგეთში შეძენილი ლევილის მამულის გადმოცემის შემდეგ განხორციელებული პროექტების დაფინანსებას ეხებოდა.

• განკარგულებაში გაწერილი იყო სავარაუდო ხარჯები პროექტის ძირითადი კომპონენტებისთვის, რომელთა შორისაცაა ლევილის მამულის შატო;
• ამ დოკუმენტის მიხედვით, სამუშაოები 2017-2026 წლებში უნდა ჩატარებულიყო.
• 2 იანვარს მოქალაქე ვახტანგ ბარამაშვილმა ლევილის მამულის დაზიანებული შენობებისა და განადგურებული ნივთების ამსახველი ფოტო-ვიდეო მასალა სოციალურ ქსელში გაავრცელა.

• "ასე გამოიყურება ლევილი დღეს. შენობა ჩამონგრეულია და წყალი ჩადის, სახურავზე ყრია წიგნები და ხელნაწერები. ექვთიმე თაყაიშვილის ღირსეული მემკვიდრეები გამოვდექით", — დაწერა კიდევ ერთმა მომხმარებელმა.
• მოგვიანებით კულტურის სამინისტრომ გავრცელებული კადრები საზოგადოების შეცდომაში შეყვანის მცდელობად შეაფასა.

დეტალები: დღეს, 21 აპრილს კულტურის სამინისტრომ გაავრცელა ინფორმაცია, რომ თეა წულუკიანი ლევილის მამულში განხორციელებული 2022-2023 წლის სამუშოების პირველ შედეგებს გაეცნო და ფოტო-ვიდეო მასალაც გამოაქვეყნა.

• განცხადებაში ვკითხულობთ, რომ ის, ასევე, სხვადასხვა ფრანგული თუ საზედამხედველო კომპანიის (Dubocq, Groupement SER Construction, SORGEM, GALLOPIN, AMIANTECH, Criatal Renovation, Normandie Renov Energetique, R.B.S. - Traveaux Bâtiment Service ) წარმომადგენლებსაც შეხვდა.
• როგორც უწყება წერს, ლევილის მამულში გალავნის, გუშაგის სახლისა და პარკის სარეაბილიტაციო სამუშაოები ჩატარდა, ისტორიული გალავნის კონსერვაცია-რესტავრაცია და ე.წ. გუშაგის სახლის შიდა სარემონტო სამუშაოები კი წარმატებით დასრულდა.

სამინისტრო წერს, რომ რეაბილიტაციის პროცესი გასული წლის 29 ნოემბერს დაიწყეს, ჩაატარეს ბაზრის კვლევა და მთავრობის განკარგულებით, სამუშაოების შესასრულებლად კომპანია შეარჩიეს.

• უწყებაში ამბობენ, რომ სამუშაოები, რომელსაც ფრანგული სააქციო საზოგადოება დიუბოკი ასრულებდა, 1053 მ² ფართობს მოიცავდა და გალავნის კედლისა და კრამით დაფარული გვირგვინის სრულ განახლებას ითვალისწინებდა.
• როგორც ისინი ამბობენ, სამუშაოების ღირებულება 376 694 56 ევროა.
• რაც შეეხება ე.წ. გუშაგის სახლს, ამბობენ, რომ სამუშაოები 2022 წლის ნოემბერში დაიწყო — დასრულებულია შიდა სამუშაოები, ხოლო ფასადის შეკეთება და გადახურვა ამ წლის აგვისტოს ბოლოს უნდა დასრულდეს, მას შემდეგ, რაც ლევილის მერია კრამიტის მოდელს დაამტკიცებს.
• მათი ცნობით, ხელშეკრულების ღირებულება 251 895 74 ევროა.
• რაც შეეხება მამულის შატოს, უწყებაში ამბობენ, რომ მისი აზბესტისგან გაწმენდა და სახურავის სრული რეაბილიტაცია 2023 წელს უნდა დასრულდეს.

დეტალები: სამინისტროში, ასევე, აცხადებენ, რომ 2022 წლის სექტემბერში ლევილის მამულის მწვანე საფარის მოწესრიგება და სანიტარული ჭრა დაიწყეს — სამუშაოები, რომლის ღირებულებაც 12 000 ევროა, რამდენიმე ეტაპად შეასრულეს და 2022 წლის დეკემბერში დაამთავრეს.

• მათივე თქმით, 2023 წლის დასაწყისიდან დღემდე გაისხლა, მოიჭრდა და დამუშავდა მწვანე საფარი, 2022 წელს კი ინვენტარიზაციის პროცესი დაასრულეს.
• დასასრულს წერენ, რომ შატოს სხვენში წლების მანძილზე ჩადიოდა წყალი, რაც აზიანებდა სხვენსა და მთელ შატოს, რეაბილიტაციის დაწყებამდე, 2021 წელსა და 2022 წლის ნოემებრში კი მათი "ძალისხმევით" სახურავი შეკეთდა.