სუდანში მეექვსე დღეა ბრძოლები მიმდინარეობს, აფეთქებები და სროლები ისმის დედაქალაქ ხარტუმსა და მიმდებარე ქალაქ ომდურმანში. მშვიდობიანი მაცხოვრებლები სახლებს ტოვებენ.

დეტალები: უახლესი ცნობებით, შეიარაღებულ კონფლიქტს სუდანში 100-მდე ადამიანი ემსხვერპლა, დაშავებულთა რაოდენობა კი 1 100-ს აღწევს.

  • სუდანში კონფლიქტი მას შემდეგ გამწვავდა, რაც დაპირისპირებულმა მხარეებმა ქვეყნის სამოქალაქო მმართველობაზე გადასვლასთან დაკავშირებით შეთანხმებას ვერ მიაღწია.

მსოფლიო ლიდერები ცდილობდნენ ზეწოლას მოახდინონ ორივე მხარეზე, რათა ცეცხლის შეწყვეტას მიაღწიონ.

  • იაპონია და ნიდერლანდები უფრო მეტ რესურსს ათავსებენ ახლომდებარე ქვეყნებში, რათა სწრაფად მოახდინონ მოქალაქეების ევაკუაცია.
  • "ბრძოლა უნდა შეწყდეს", — განაცხადა უსაფრთხოებისა და საგარეო ურთიერთობების საკითხებში ევროკავშირის უმაღლესმა წარმომადგენელმა, ჯოზეფ ბორელმა ბრიუსელში.
  • მისი ცნობით, სუდანში ევროკავშირის ელჩს, აიდან ოჰარას საკუთარ რეზიდენციაში თავს დაესხნენ.
  • ბორელმა მხარეებს მოუწოდა დაიცვან მშვიდობიანი მოსახლეობა და უზრუნველყონ ჰუმანიტარული დახმარების სწრაფი და შეუფერხებელი მიწოდება.

რატომ არის მნიშვნელოვანი: სუდანი, სიდიდით მესამე ქვეყანა აფრიკაში, მდებარეობს არასტაბილურ და გეოპოლიტიკურად მნიშვნელოვან რეგიონში.

  • სუდანი ესაზღვრება შვიდ ქვეყანას, რომელთაგანაც თითოეულს უსაფრთხოების გამოწვევები აქვს, რაც გადაჯაჭვულია ხარტუმის პოლიტიკასთან.
  • ქვეყნის არმიასა და გასამხედროებულ ჯგუფს, RSF-ს შორის ბრძოლებმა მძიმე ზიანი მიაყენა მშვიდობიან მოსახლეობას.