ინფორმაციას პროკურატურა ავრცელებს.

რატომ არის მნიშვნელოვანი: ბრალდებული დამნაშავედ ცნეს დამამძიმებელ გარემოებაში ჩადენილ განზრახ მკვლელობასა და შემაკავებელი ორდერის მოთხოვნების შეუსრულებლობაში.

  • კაცი აქამდეც იყო დაკავებული ოჯახში ძალადობის ბრალდებით, თუმცა, პროკურატურის ინფორმაციით, თელავის სასამართლომ დაუსაბუთებლად არ გაიზიარა ბრალდების მხარის პოზიცია, სათანადოდ ვერ შეაფასა ახალი დანაშაულის ჩადენისა და მიმალვის საფრთხეები და ბრალდებული 2000-ლარიანი გირაოთი გაათავისუფლა.
  • "ბრალდებულს, რომელსაც არ შეეფარდა პატიმრობა, მიეცა შესაძლებლობა სისრულეში მოეყვანა თავისი მუქარა და სასტიკად გაუსწორდა ყოფილ მეუღლეს, რამაც ეს უმძიმესი შედეგი გამოიწვია", — აცხადებენ პროკურატურაში.

დეტალები: ქმარმა ყოფილი ცოლი ცივი იარაღის გამოყენებით თელავში, გასული წლის ოქტომბერში მოკლა, შემდეგ კი დანაშაულის ადგილიდან მიიმალა.

  • ბრალდებულის მიმართ გამოცემული იყო შემაკავებელი ორდერი, თუმცა ამას დამნაშავისთვის ხელი არ შეუშლია.
  • ბრალდების მხარე სასჯელის დამძიმების მიზნით განაჩენს სააპელაციო სასამართლოში გაასაჩივრებს.

ფემიციდი გენდერული ნიშნით ქალთა მკვლელობაა. უფლებადამცველები არაერთი წელია ითხოვენ კანონში ფემიციდის დეფინიციის ჩაწერას.

  • ევროკომისიის რეკომენდაციების შემდეგ ქალთა მოძრაობამ პარლამენტს მიმართა და მოითხოვა, რომ ქალზე და ოჯახში ძალადობაზე კანონს ფემიციდის განმარტება დაემატოს.

მნიშვნელოვანია ვიცოდეთ, რომ ოჯახში ძალადობა არ გულისხმობს მხოლოდ ფიზიკურ შეხებას. ოჯახის წევრის მხრიდან ფსიქოლოგიური ზეწოლა, მუქარა, შანტაჟი, სიტყვიერი შეურაცხყოფა ასევე ძალადობაა და კანონით აკრძალულია.

  • ოჯახში ძალადობის შემთხვევაში პოლიციის გამოძახება შესაძლებელია 112-ზე დარეკვით. ზარი უფასოა.
  • საკონსულტაციო მომსახურების გაწევის მიზნით ფუნქციონირებს ცხელი ხაზი — 116 006.

საჭიროების შემთხვევაში შეგიძლიათ დარეკოთ შემდეგ ნომრებზე:

  • საფარის უფასო იურიდიული დახმარება — 0322 30 76 03; 599 40 76 03;
  • სახალხო დამცველის ცხელი ხაზი — 1481.