უკრაინის თავდაცვის სამინისტრო ყველას მოუწოდებს, შეწყვიტონ ტყვის სიკვდილით დასჯის ამსახველი ვიდეოს გავრცელება.

დეტალები: თავდაცვის მინისტრის მოადგილემ, განა მალიარმა განაცხადა, რომ სპეციალური სამსახურები გარდაცვლილისა და დამნაშავის იდენტიფიცირებაზე მუშაობენ.

  • "მნიშვნელოვანია გვესმოდეს, რომ ვიდეოზე ადამიანის იდენტიფიცირება და მით უმეტეს ასეთ ვითარებაში მყოფი ადამიანის იდენტიფიცირება უკიდურესად რთული ამოცანაა. ამიტომ გთხოვთ, ოფიციალურ დასკვნამდე თავი შეიკავოთ ვერსიების საჯაროდ გაჟღერებისგან. გთხოვთ, პატივი სცეთ გარდაცვლილის ახლობლებს, ნუ გააკეთებთ საჯარო ვარაუდებს გარდაცვლილის ვინაობის შესახებ", — წერს მალიარი ტელეგრამ არხზე.
  • "გახსოვდეთ, მტერს ჩვენი დაშინება სურს. მაგრამ სანაცვლოდ მიიღებენ ოკუპანტების სრულ მარცხს, სასჯელს მკვლელებისთვის და ტრიბუნალს აგრესორი სახელმწიფოსთვის", — აცხადებს იგი.

რა მოხდა: 11 აპრილის საღამოს სოციალურ ქსელებში გავრცელდა უკრაინელი ტყვის სასტიკი მკვლელობის ამსახველი ვიდეო.

  • კადრებში ჩანს, როგორ ჭრიან, სავარაუდოდ, რუსი სამხედროები უკრაინელ მებრძოლს თავს, შემდეგ კი კამერის წინ დემონსტრაციულად დაატარებენ.
  • ვიდეოში ოკუპანტები ამბობენ, რომ მოჭრილ თავს უკრაინელი სამხედროს მეთაურს გაუგზავნიან.
  • ვიდეოში, რომელშიც დამნაშავე რუსი სამხედროების სახეები ნიღბებითაა დაფარული, ჩანს მწვანე ფოთლები და ბალახი, რაზე დაყრდნობითაც, უკრაინული მედიები ვარაუდობენ, რომ ჩანაწერი გასული წლის ზაფხულშია გადაღებული.

უკრაინის პრეზიდენტი მსოფლიო ლიდერებს სიკვდილით დასჯის ვიდეოზე რეაგირებისკენ მოუწოდებს.

  • "არის რაღაც, რასაც მსოფლიოში ვერავინ დააიგნორებს. რა იოლად კლავენ ეს მხეცები. ეს ვიდეო უნდა ნახოს მსოფლიომ. ეს არის რუსეთის სახე", — ამბობს ზელენსკი.
  • "ვინ არიან ეს არსებები? მათთვის არ არსებობს შვილი, ძმა, ქმარი, ვიღაცის ბავშვი. ეს არის ვიდეო, სადაც რუსეთი ცდილობს, ნორმად აქციოს ჩვევა, გაანადგუროს ცხოვრება.
  • ეს არ არის უბედური ან ეპიზოდური შემთხვევა. ადრეც ასე იყო, ბუჩაშიც ასე იყო. ათასჯერ. ყველამ უნდა უპასუხოს, ყველა ლიდერმა. არ უნდა დაველოდოთ, რომ დრო გავა და ყველას დაავიწყდება".