რატომ არის მნიშვნელოვანი: არასამთავრობო სექტორი წლებია საუბრობს ლევან მურუსიძისა და მიხეილ ჩინჩალაძის გავლენებზე, რომლებიც ე.წ. მოსამართლეთა "კლანის" მმართველებად მოიაზრებიან.

  • საერთაშორისო პარტნიორების ნაწილი და ოპოზიციის წარმომადგენლები კი "სადავო" მოსამართლეებს მმართველი გუნდის პოლიტიკური დაკვეთის შემსრულებლებად მიიჩნევენ.

გამოხმაურებები და გზავნილები: თბილისის სააპელაციო სასამართლოს თავმჯდომარის მოადგილე, ირაკლი შენგელია აცხადებს, რომ აშშ-ს სახელმწიფო დეპარტამენტმა და ელჩმა დეგნანმა იგი და სხვა სანქიცრებულნი "ლინჩის წესით გაასამართლა", რამაც სურვილი დაუკარგა აშშ-ს ეწვიოს.

  • "ეს ყველაფერი მაფიქრებინებს, რომ სახეზეა აპრობირებული სქემა, რომელმაც კარგად იმუშავა, მაგალითად, უკრაინაში, ალბანეთში, სადაც, რეფორმების შირმით, განხორციელდა არასასურველი მოსამართლეებისაგან სისტემის წმენდა; სადაც ხელყოფილ იქნა სახელმწიფოების სუვერენიტეტი სასამართლო ხელისუფლების ნაწილში და ამ ხელისუფლების ადმინისტრირება მთლიანად გადაბარებულ იქნა ე.წ. საერთაშორისო ექსპერტებისგან დაკომპლექტებულ რევიზორთა კომისიაზე", — ვარაუდობს შენგელია.
  • ყოფილი მოსამართლე და თბილისის სააპელაციო სასამართლოს ყოფილი თავმჯდომარე და იუსტიციის უმაღლესი საბჭოს ყოფილი მდივანი — ვალერიან ცერცვაძე აცხადებს, რომ

    არ არსებობს არცერთი ფაქტი და მტკიცებულება, რომელიც დაადასტურებს გაჟღერებულ ბრალდებებს.

  • ცერცვაძის შეფასებით, სანქცირებასთან დაკავშირებულ განცხადებებს პოლიტიკური შინაარსი აქვს და "მიზნად ისახავს სასამართლოში გავლენის მოპოვებას და მის სრულ დისკრედიტაციას".

  • თბილისის სააპელაციო სასამართლოს უვადოდ დანიშნული მოსამართლე და იუსტიციის უმაღლესი საბჭოს წევრი — ლევან მურუსიძე აცხადებს, რომ სანქცირების მიზანი საელჩოს მიერ სასამართლო სისტემაში ჩარევა და გადაწყვეტილებებზე გავლენის მოხდენაა.
  • იგი ოპტიმისტურადაა განწყობილი და აცხადებს, რომ აშშ-ში არც ბაბუამისს უვლია და შეუძლია საკუთარ სამშობლოში დაყოს დრო, რომელიც ამავდროულად ღვთისმშობლის წილხვედრიცაა.

კონტექსტი: ამერიკის შეერთებული შტატების სახელმწიფო დეპარტამენტმა სანქციები დაუწესა საქართველოში სამ მოქმედ და ერთ ყოფილ მოსამართლეს — ლევან მურუსიძეს, მიხეილ ჩინჩალაძეს, ირაკლი შენგელიას და ვალერიან ცერცვაძეს.

  • სახელმწიფო დეპარტამენტის განცხადებით, მათ ბოროტად გამოიყენეს თანამდებობა, როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა.
  • განცხადებაში აღნიშნულია, რომ მოსამართლეები "მნიშვნელოვან კორუფციულ საქმიანობაში ჩართულობის გამო" სანქცირდებიან.
  • გარდა ამისა, სანქციები დაუწესდათ მოსამართლეების წევრებსაც და აშშ-ში შესვლა აეკრძალათ.