ამის შესახებ იუსტიციის მინისტრი პოსტს სოციალურ ქსელში აქვეყნებს.

რატომ არის მნიშვნელოვანი: პოსტი ბრეგაძემ მას შემდეგ დაწერა, რაც პარტია გირჩის ორგანიზებით პარლამენტთან სავალდებულო სამხედრო სამსახურის წინააღმდეგ აქცია გაიმართა — მათი მოთხოვნაა, სამხედრო სამსახური ნებაყოფლობითი იყოს.

  • ბრეგაძე ამბობს, რომ ჯარის საკითხის პოლიტიზება საქართველოს ეროვნულ ინტერესებთან ვერ იქნება თავსებადი.
  • გუშინ, 10 მარტს თავდაცვის სამინისტრომ გაავრცელა განცხადება, რომ თავდაცვის ახალი კოდექსი შეიმუშავეს, რომლის თანახმადაც სტუდენტებისთვის სამხედრო სამსახური სავალდებულო აღარ იქნება.
  • უწყების თქმით, ჯარში სტუდენტებს მხოლოდ სურვილის შემთხვევაში გაიწვევენ.

დეტალები: ბრეგაძე წერს, რომ საქართველოს დაცვა ყოველი მოქალაქის ვალია, შემდეგ კი საუბრობს იმაზე, რომ ჯარი "პატრიორ, განათლების მიღებაზე ორიენტირებულ, დაუღალავ და შრომისმოყვარე მამულიშვილთა ერთობაა".

  • "ჯარში სამშობლოს სიყვარული სრულიად განსხვავებულ და გასაოცარ ბუნებას იძენს. სადაც არ უნდა წავიდეს ადამიანი სამხედრო სამსახურის შემდეგ ის ყოველთვის ქვეყნის გულანთებული გულშემატკივარი იქნება".
  • "მისტიურია ის გრძობა, რომელიც დაგეუფლებათ სამხედრო ფიცის დადებისას საქართველოს დროშის წინ მუხლმოდრეკილი ახალგაზრდა ვაჟკაცების თვალებზე მომდგარი ცრემლის დანახვისას. ეს ის ბედნიერი მომენტია, როდესაც დარწმუნდებით რომ ჩვენს ქვეყანას ნათელი მომავალი აქვს", — წერს ბრეგაძე.