თბილისის საპროტესტო აქციებზე Amnesty International-ის აღმოსავლეთ ევროპისა და ცენტრალური აზიის დირექტორმა, მარი სტრუტერსმა ისაუბრა.

რატომა არის მნიშვნელოვანი: 7 მარტიდან, საქართველოს ქალაქებში რუსული კანონის საწინააღმდეგო დემონსტრაციები იმართება.

  • აქციას უერთდება ყველა საზოგადოებრივი სექტორის წარმომადგენელი, მათ შორის — მედიები და არასამთავრობო ორგანიზაციები, რომლებიც კრემლის გავლენით შთაგონებული კანონის პირდაპირი სამიზნეები არიან.
  • მზარდი საზოგადოებრივი პროტესტისა და საერთაშორისო კრიტიკის ფონზე, ქართულმა ოცნებამ განაცხადა, რომ კანონპროექტს უკან გაიწვევს, თუმცა, პარალელურად, დაიწყებს ხალხთან დიალოგს და შემეცნებითი ხასიათის კონსულტაციებს ჩასაგდებად გადადებული კანონის ავკარგიანობაზე.

დეტალები: Amnesty-ის განცხადებით, მომიტინგეებმა დიდი გამბედაობა გამოიჩინეს, როდესაც ისინი წყლის ჭავლს და ცრემლსადენ გაზს დაუპირისპირდნენ.

  • "ხშირ შემთხვევაში, პოლიციის მიერ ძალის გამოყენება არც პროპორციული იყო და არც აუცილებელი და ვერ შეძლო აღეკვეთა ზიანი", — ნათქვამია ორგანიზაციის გავრცელებულ განცხადებაში.
  • მათი შეფასებით, ცრემლსადენი გაზისა და წყლის ჭავლის ინტენსიური გამოყენება შეიძლება იყოს წამება ან სხვა არასათანადო მოპყრობა და საფუძვლიანად უნდა იქნას გამოძიებული.