რატომ არის მნიშვნელოვანი: მოქალაქეები, პოლიტიკოსები, სხვადასხვა სფეროს წარმომადგენლები პარლამენტთან დილიდან, ბიუროს სხდომის პარალელურად, შეიკრიბნენ, თუმცა როდესაც ადგილის დატოვება დაიწყეს, უმრავლესობამ რუსული კანონის განხილვა, 9 მარტის ნაცვლად, დღესვე გადაწყვიტა.

  • მაშინვე დაიგეგმა მეორე აქცია, რომელიც ახლაც გრძელდება — გადაკეტილია რუსთაველის გამზირი.
  • ახლა საკანონმდებლო ორგანოსთან შეკრებილები რუსულ კანონს აპროტესტებენ, რომელსაც მხარი 76-მა დეპუტატმა დაუჭირა, 13 კი მის წინააღმდეგ წავიდა.

დეტალები: აქციაზე სიტუაცია მას შემდეგ დაიძაბა, რაც მოქალაქეებმა პარლამენტის გვერდითა შესასვლელიდან ასვლა მოინდომეს, სპეცრაზმმა კი მათ გზა ჩაუკეტა.

  • მალევე გამოჩნდა წყლის ჭავლის მანქანებიც, აქციის მონაწილეების წინააღმდეგ კი, სავარაუდოდ, წიწაკის სპრეის გამოყენება დაიწყეს.
  • შსს ამტკიცებდა, რომ აქციამ ძალადობრივი ხასიათი მიიღო და მოქალაქეებს აფრთხილებდა, რომ მათ მიმართ გამოყენებული იქნებოდა "კანონით გათვალისწინებული ძალა".
  • მალევე მშვიდობიანი მოქალაქეების წყლის ჭავლით დარბევა დაიწყო.