დღეს ჟურნალისტებთან საუბრისას, რუსული კანონის ერთ-ერთმა ინიციატორმა, დეპუტატმა მიხეილ ყაველაშვილმა ქალი პოლიტიკოსები სექსისტურ და დამამცირებელ კონტექსტში მოიხსენია.

რატომა არის მნიშვნელოვანი: საქართველოს საკანონმდებლო ორგანოში რუსული კანონისთვის მსვლელობის მიცემას აპროტესტებს საზოგადოების სხვადასხვა სექტორის წარმომადგენელი, ქვეყნის ევროპელი და ამერიკელი პარტნიორები, საერთაშორისო ორგანიზაციები, საელჩოები და ა.შ.

  • განსაკუთრებით ცხარე დებატები მიმდინარეობს საკანონმდებლო სივრცეში, სადაც დეპუტატებს ხშირად პარტიული ნიშნით ან კრიტიკული პოზიციის გამო არ უშვებენ.
  • რუსული კანონის განხილვისას ქალი პოლიტიკოსები სხდომათა დარბაზიდან ფიზიკური ძალის გამოყენებით გააძევეს.

დეტალები: ყაველაშვილი ხშირად მიმართავს უცენზურო გამონათქვამებს ოპოზიციონერი კოლეგების მისამართით. დღეს ჟურნალისტებთან საუბრისას იგი თავს ქალ დეპუტატებს დაესხა.

  • "ამ სამარცხვინო ქალების ქცევა კომიტეტის სხდომაზე მთელმა საქართველომ იხილა, რა არის ველურობა, და როგორ არ უნდა იქცეოდეს მითუმეტეს — ქალი", — განაცხადა ყაველაშვილმა.
  • "ვის უნდა ასწავლოს ჭკუა ნაცვლიშვილმა, კორძაიამ, სამნიძემ, წითლიძემ", — დასძინა მან.
  • ჟურნალისტებმა დეპუტატს ქალების მისამართით დისკრიმინაციულ გამონათქვამებზე მიუთითეს, რის შემდეგაც იგი მათაც გადასწვდა და ჩასაფრებული და მართული ადამიანები უწოდა.
  • "თქვენ საიტებზე დევს ჩემი ფრაზები, არასწორად აშუქებთ ჩემს ფრაზებს, ოღონდ რომელიმემ გაბედეთ და ჯანსაღი კითხვა დამისვით", — განაცხადა მან.