განახლება: პარლამენტმა აკრედიტაცია აღუდგინა პუბლიკას 2 ჟურნალისტს და ტაბულას რედაქტორს.

აკრედიტაცია შეუჩერეს პუბლიკას 3 ჟურნალისტს და ტაბულას რედაქტორს.

რატომ არის მნიშვნელოვანი: 2 მარტს პარლამენტის შენობაში გაერთიანებული კომიტეტის სხდომაზე "აგენტების შესახებ" კანონპროექტებს განიხილავდნენ.

  • პარლამენტის შენობაში ჟურნალისტების ნაწილი პროფესიულ მოვალეობას ასრულებდა, ნაწილი კი კანონპროექტის განხილვას აპროტესტებდა.

კონტექსტი: 1 მარტიდან პარლამენტში მედიისთვის ახალი წესები ამოქმედდა.

  • იმ მედიის წარმომადგენლებისთვის, რომლებიც აშუქებენ საპარლამენტო საქმიანობას, განისაზღვრა აკრედიტებული ჟურნალისტების რაოდენობა — ონლაინ მედიისთვის ეს არის არაუმეტეს 4 ჟურნალისტი.
  • წესების მიხედვით, აკრედიტებული ჟურნალისტისთვის აკრედიტაციის შეჩერება დასაშვებია პარლამენტის აპარატის უფროსის გადაწყვეტილებით, თუ ჟურნალისტი დაარღვევს ახალ წესებს.

  • ბრძანებაში ნათქვამია, რომ დარღვევის განმეორების შემთხვევაში აკრედიტებულ ჟურნალისტს აკრედიტაცია შეუჩერდება 6 თვით.

  • გარდა ამისა, დაუშვებელია, ჟურნალისტი, რომელსაც აკრედიტაცია შეჩერებული აქვს, სხვა ჟურნალისტით ჩანაცვლდეს.

  • ჯერ კიდევ 7 თებერვალს ქარტიამ პარლამენტის თავმჯდომარეს მოუწოდა, ახალი შემზღუდავი ბრძანება გაეუქმებინა.

დეტალები: პუბლიკა ავრცელებს ინფორმაციას, რომ პარლამენტის აპარატმა აკრედიტაცია 1 თვით შეუჩერა მათ სამ ჟურნალისტს, ნათია ამირანაშვილს, ქეთი გოგუაძესა და ნათია ლევერაშვილს.

  • გამოცემას პარლამენტის აპარატიდან აცნობეს, რომ გადაწყვეტილების წერილობით დასაბუთებას აკრედიტებული ჟურნალისტებისთვის პარლამენტში მუშაობის შეზღუდვაზე სამუშაო დღეს ჩააბარებენ.
  • როგორც On.ge-ს ჟურნალისტმა, ქეთი გოგუაძემ უთხრა, დასაბუთების ჩაბარების შემდეგ გადაწყვეტილებას გაასაჩივრებენ. მისი თქმით, ასრულებდა ჟურნალისტის მოვალეობას და არ დაურღვევია მედიისთვის გაწერილი ახალი წესები.
  • "პარლამენტმა გუშინწინ აღებული აკრედიტაცია შემიჩერა "აქციის მოწყობის" გამო. ყველაზე კარგი ამ ამბავში ის არის, რომ იმ აქციაზე, რომელზეც ლაპარაკობენ, გასაშუქებლად ვიყავი, არც ახალი მოგონილი "წესები" დამირღვევია, არც არავის გავკიდებივარ. ამისთვის დაგვირიგეს აკრედიტაციები — მერე, როცა მოუნდებათ, 1 თვით რომ აღარ შეგვიშვან პარლამენტში", — წერს ტაბულას რედაქტორი ცისია კირვალიძეც.

აქციაზე, რომელიც 2 მარტს პარლამენტის შენობის გარეთ იმართებოდა, დააკავეს ტაბულას ჟურნალისტი, ბექა ჯიქურაშვილი და პუბლიკას დირექტორი, ზურა ვარდიაშვილი.

  • ქარტიამ ჟურნალისტების დაკავება და მათთვის ხელშეშლა დაგმო.