ამის შესახებ უწყება განცხადებას ავრცელებს.

რატომ არის მნიშვნელოვანი: გუშინ, 13 თებერვალს ბათუმში, სანაპიროზე აფეთქება მოხდა.

• გამოცემა ბათუმელების პირდაპირ ეთერში ჩანს, რომ სანაპიროზე კვამლია, ადგილზე კი მობილიზებული არიან სამართალდამცავები და საგანგებო სიტუაციების მართვის სამსახურის თანამშრომლები.
• თვითმხილველების გადაღებულ კადრებში კი ვხედავთ, რომ ზღვაზე, სავარაუდოდ, საბრძოლო ნაღმი ტივტივებს, ნაპირთან მიახლოებისას კი ფეთქდება.
• ერთ-ერთი თვითმხილველი ბათუმელების ჟურნალისტს ეუბნება, რომ ნაღმი დაინახა და გადაღება მოასწრო, მალევე კი ის მისგან 5 მეტრში აფეთქდა.
• სოციალურ ქსელში უკვე გაჩნდა ვარაუდი, რომ ასაფეთქებელი მოწყობილობა უკრაინაში ომისას შავ ზღვაში რუსების მიერ განთავსებული ნაღმია, რომელიც წყალმა გამორიყა — ამის არანაირი დასტური არ არსებობს.
• შემთხვევის შედეგად არავინ დაშავებულა.
• შსს-მ მომხდარზე გამოძიება საქართველოს სისხლის სამართლის კოდექსის 229-ე მუხლის 1-ლი ნაწილით დაიწყო, რაც აფეთქებას გულისხმობს.

დეტალები: უწყების ცნობით, გამოძიების ფარგლებში, განხორციელდა განაღმვითი სამუშაოები, ამოღებულია ასაფეთქებელი მოწყობილობის ნარჩენები და დანიშნულია შესაბამისი ექსპერტიზები.

• ასევე ამოღებული და შესწავლილია მოქალაქეების მიერ გადაღებული, ფაქტის ამსახველი კადრები და ეტაპობრივად ხდება ბათუმისა და ფოთის მიმდებარე აკვატორიის, ასევე, ნავსადგურების დათვალიერება
• ასევე ანაკლიიდან სარფამდე სანაპირო ზოლის მონიტორინგი.

მოქალაქეთა უსაფრთხოების დაცვის მიზნით, უწყებაში შესაბამისი დანაყოფები სპეციალური ტექნიკისა და აღჭურვილობის მეშვეობით მოახდენენ სანაპირო ზოლის დაცვის მონიტორინგს.

• შსს-ს ცნობით, ისინი შეასრულებენ უსაფრთხოების შესაბამის პრევენციულ ღონისძიებებს საქართველოს ტერიტორიულ წყლებში.
• "ამასთანავე, გაიმართება საინფორმაციო შეხვედრები ადგილობრივ მეთევზეებთან, სანაოსნო-სატრანსპორტო საქმიანობაში ჩართულ ორგანიზაციებსა და ადგილობრივი თვითმმართველობის წარმომადგენლებთან", — ნათქვამია განცხადებაში.
• მათი განმარტებით, საქართველოს ტერიტორიულ წყლებში, სანაპირო ზოლის გასწვრივ განთავსდება სპეციალური ბარიერები.
• მათი თქმით, საერთაშორისო სტანდარტის შესაბამისად გამოიცა სპეციალური ცირკულარი, ნავიგაციის უსაფრთხოების ზომების შესახებ.
• უწყების ცნობით, ნავსადგურების კაპიტნებისა და ჰიდროგრაფიული სამსახურის მიერ მოხდა ადგილობრივი მოსახლეობის, კომერციული, სატრანსპორტო და სატვირთო გემების, აგრეთვე თევზსაჭერი სეინერების წარმომადგენლების ინფორმირება.
• ამბობენ, რომ რეგიონში არსებული ვითარების გამო, ბოლო პერიოდში მსგავსი ფაქტები დაფიქსირდა შავი ზღვის მიმდებარე სხვა სახელმწიფოებშიც.

გარდა ამისა, შსს ამბობს, რომ საქართველოს სასაზღვრო პოლიციის სანაპირო დაცვის დეპარტამენტსა და შავი ზღვის აუზის ქვეყნებს შორის არსებული ურთიერთთანამშრომლობის ფორუმის ფარგლებში, გასულ წელს მიაწოდეს ინფორმაცია, რომ შავი ზღვის აუზის ქვეყნების საზღვაო სივრცეში (თურქეთი, რუმინეთი, ბულგარეთი და უკრაინა) აღმოჩენილია მცურავი ნაღმები.

• ასევე მიიღეს ინფორმაცია, რომ ცუდი მეტეოროლოგიური პირობების (შტორმი) შედეგად, შესაძლებელია, მცურავი ნაღმები შემოტანილ იქნას საქართველოს საზღვაო სივრცეში.
• შინაგან საქმეთა სამინისტრო მოქალაქეებს მოუწოდებს, რომ ზღვაში ან სანაპირო ზოლზე საეჭვო ნივთის შემჩნევის ან აღმოჩენის შემთხვევაში, დაუყოვნებლივ დაუკავშირდნენ საზოგადოებრივი უსაფრთხოების მართვის ცენტრ 112-ს და დეტალურად მიაწოდონ ინფორმაცია.