საქართველოს ჟურნალისტური ეთიკის ქარტიის სამდივნომ დასაშვებად სცნო ორგანიზაციის პარტნიორობა ადამიანის უფლებებისთვის (PHR) განცხადება ნინი ობგაიძის წინააღმდეგ.

PHR მიიჩნევს, რომ "ჟურნალისტის მხრიდან ადგილი ჰქონდა ბავშვის უფლებებისა და ბავშვის პირადი ცხოვრების დარღვევის ფაქტს, არ არსებობდა ლეგიტიმური საზოგადოებრივი ინტერესი, რომელიც გაამართლებდა მისი მხრიდან აღნიშნული კადრების გამოყენებას. ამ კადრების გაშვება, გადაცემაში განხილული საკითხის ანალიზისა და წარმოჩენისთვის, საჭიროებას არ წარმოადგენდა."

აქედან გამომდინარე განმცხადებელი ფიქრობს, რომ დარღვეულია ქარტიის მერვე (ბავშვთა უფლებები) და მეათე (პირადი ცხოვრების ხელშეუებლობა) პრინციპები.

ქარტიის საბჭო საქმეს ღია სხდომაზე განიხილავს, სადაც დასწრება ყველა დაინტერესებულ პირს შეუძლია.

გადაცემა "ბავშვების დროს" მიერ 25 მაისს გამოქვეყნებულ ვიდეოში, ჩანდა არასრულწლოვანის "მასტურბაცია", რომელიც ბავშვის დედამ გადაიღო და ეს ვიდეო გადაცემის წარმომადგენლებს გადასცა.

გადაცემა იუთუბზე გამოქვეყნდა და რამდენიმე საათის განმავლობაში იყო ხელმისაწვდომი.

აღნიშნულზე შსს-მ გამოძიება სისიხლის სამართლის კოდექსის 255-ე მუხლის მეორე ნაწილით დაიწყო, რაც გულისხმობს პორნოგრაფიული ნაწარმოების, ნაბეჭდი გამოცემის, გამოსახულების ან პორნოგრაფიული ხასიათის სხვა საგნის უკანონოდ დამზადებას, გავრცელებას ან რეკლამირებას, აგრეთვე, ასეთი საგნით ვაჭრობას ანდა მის შენახვას გაყიდვის ან გავრცელების მიზნით.

პერსონალურ მონაცემთა დაცვის ინსპექტორმა დაუშვებელი უწოდა ბავშვის შესახებ მსგავსი ვიდეომასალის გავრცელებას. ომბუდსმენმა განაცხადა, რომ გადაცემამ შელახა ბავშვის ღირსება და რეპუტაცია. გადაცემა გააკრიტიკა ფსიქოლოგმა მაია ცირამუამაც. მოგვიანებით გადაცემის წარმომადგენლებმა განაცხადეს, რომ დედის თხოვნით, ვიდეო, სადაც ბავშვის კადრები ჩანს, გადაცემიდან ამოიჭრებოდა.