პრემიერმინისტრმა ირაკლი ღარიბაშვილმა დღეს, 28 ნოემბერს, მთავრობის სხდომაზე სააფთიაქო ქსელ PSP-ზე ისაუბრა.

რატომ არის მნიშვნელო: მთავრობის განკარგულებით, საქართველოში თურქეთის ფარმაცევტული ბაზარი იანვარში გაიხსნა და მისი მიზანი მედიკამენტებზე ფასების შემცირება იყო.

  • ღარიბაშვილის განცხადებით, არსებობს ინფორმაცია, რომ PSP-ს აფთიაქებში თურქულ მედიკამენტებთან დაკავშირებით ადამიანები შეცდომაში შეჰყავთ.
  • პრემიერმინისტრის თქმით, მსგავსი ფაქტის განმეორების შემთხვევას მკაცრი რეაგირება მოჰყვება.

დეტალები: ღარიბაშვილი ხალხის შეცდომაში შეყვანას "მტრობასა" და "უმსგავსობას" უწოდებს და ამბობს, რომ "ამას რეაგირება სჭირდება".

  • "მაგალითად, როცა შედის მომხმარებელი და კონკრეტული წამლის ყიდვას ითხოვს და ეს ვიცი, რომ დავალებაა, ასეთი ინფორმაცია არსებობს. ამას, რა თქმა უნდა, გადამოწმება სჭირდება, გამყიდველი ეუბნება, რომ რომელი გნებავთ ხარისხიანი, ძვირიანი, თუ უხარისხო თურქული", — ამბობს პრემიერმინისტრი.
  • მისი თქმით, ჯანდაცვის სამინისტრო აქტიურად მუშაობს მედიკამენტების ფასების შემცირების საკითხზე, რის შედეგადაც წელიწადში, დაახლოებით, 200 მლნ ლარს ზოგავს ქვეყნის მოსახლეობა.

PSP-ს განცხადებით, პრემიერმინისტრს გადაუმოწმებელი ინფორმაცია მიაწოდეს. მათი განმარტებით, ინფორმაცია აუცილებლად უნდა გადამოწმდეს.

  • კომპანიაში ამბობენ, რომ ფარმაცევტული სექტორი თურქული წარმოების იაფიანი მედიკამენტების პროექტში მომზადების ეტაპზევე ჩაერთო და დღეს PSP არის თურქული მედიკამენტების ერთ-ერთი მსხვილი დისტრიბუტორი საქართველოში.
  • მათი თქმით, PSP-სთვის მომხმარებლის ინტერესი უპირველესია და ფარმაცევტები მომხმარებელს ყოველთვის ექიმის დანიშნულების მიხედვით ემსახურებიან.