პარტიის ლიდერმა, გიორგი ვაშაძემ ამის შესახებ პალიტრანიუსის ეთერში ისაუბრა.

რატომ არის მნიშვნელოვანი: პარლამენტში ოპოზიციის წარმომადგენლობა უფრო და უფრო მცირდება.

  • ეს საკითხი პრობლემატური ჯერ კიდევ არჩევნების შემდეგ იყო — საკანონმდებლო ორგანოში შესვლა-არშესვლამ ოპოზიციურ პარტიებს შორის აზრთა სხვადასხვაობაც გამოიწვია.
  • ნაწილმა თავიდანვე უარი თქვა დეპუტატობაზე, ნაწილმა 19 აპრილის შეთანხმების ანულირების შემდეგ, რამდენიმეს კი მანდატი სხვა მიზეზებით შეუწყვიტეს.

დეტალები: ვაშაძის თქმით, ისინი შინაგანად მზად არიან, რომ პარლამენტი დატოვონ და ამ სცენარს განიხილავენ, რადგან მხოლოდ იქ აპირებენ ყოფნას, სადაც ევროპარლამენტის 2-პუნქტიან რეკომენდაციებს განიხილავენ.

  • "საკონსტიტუციო ცვლილებებს ჩემი ხმა სჭირდებოდა. შევედი და ხმა მივეცი. ხოდა არ ვაპირებ ახლა ჩვეულებრივად, რაღაცა, ყოველდღიურ რეჟიმში მუშაობას კობახიძეებთან და სხვებთან", — აცხადებს ის.
  • საკანონმდებლო ორგანოს შესაძლო დატოვების მიზეზად დეპუტატი "პარლამენტში მყოფ პრორუსებსაც" ასახელებს: "ღიად ვამბობ იმიტომ, რომ ჩემთვის, იმდენად აუტანელია ერთ გარემოში ყოფნა პრორუსებთან უკვე, რომ ვხედავთ ფაქტობრივად ერთხელ შევედი სასესიო დარბაზში".
  • მისივე განმარტებით, პარლამენტიდან წამოსვლისთვის აუცილებელია დასავლელ პარტნიორებში სიტუაციის შემზადება, რომ კარგად აუხსნან, რა ხდება და ეს არ უნდა იყოს ნაადრევი და ნაჩქარევი.

კითხვას, თუ როდის შეიძლება იყოს შესაფერისი დრო, რომ პარლამენტი დატოვონ, ვაშაძე ასე პასუხობს:

  • "როცა ის მოცემულობა დადგება, როცა საზოგადოება შეთანხმდება, რომ ქართული ოცნებიდან არაფერი აღარ გამოვა, რომ ის არის პრორუსული ძალა, რომ კანდიდატის სტატუსი მათთან ერთად არ იქნება. აი, ეს მოცემულობა რომ შედგება, შემდგომ ჩვენი ნაბიჯიც ამის პარალელურად იქნება. თუმცა დაელოდეთ, ჩვენ ბევრი რამ გვაქვს გეგმაში".

არქივი: 28 ოქტომბერს დეპუტატმა, თეონა აქუბარდიამ სტრატეგია აღმაშენებელი დატოვა — დამოუკიდებელი დეპუტატი გახდა და პოლიტიკური ჯგუფის რეფორმების შემადგენლობაში დარჩა.

  • მისი განმარტებით, ეს გადაწყვეტილება განპირობებულია ბოლო პერიოდში სტრატეგია აღმაშენებელის დისტანცირებით საპარლამენტო მუშაობისგან, რამაც არაერთხელ გამოიწვია განსხვავებები მათ პოზიციებს შორის.