პარტია გირჩი სახალხო დამცველის არჩევნებთან დაკავშირებით პარტიებს შეთავაზებით მიმართავს.

რატომ არის მნიშვნელოვანი: ევროკავშირის მიერ გაცემულ 12 რეკომენდაციაში, ერთ-ერთი სახალხო დამცველის გამჭვირვალედ და დემოკრატიულად არჩევას უკავშირდება.

  • მოქმედ სახალხო დამცველს, ნინო ლომჯარიას უფლებამოსილების ვადა 2022 წლის 8 დეკემბერს ეწურება;
  • სულ ომბუდსმენობის 19 კანდიდატია და მათთან გასაუბრება პარლამენტში უკვე დაიწყო.

დეტალები: გირჩის განცხადებით, მოადგილეობის თანამდებობებს დაუთმობენ იმ პარტიას, რომლისგანაც ყველაზე მეტ მხარდაჭერას მივიღებთ სახალხო დამცველად არჩევის დროს.

  • ამბობენ, რომ ამ მოადგილეების მეშვეობით პარტიები შეძლებენ მათთვის პრიორიტეტულ თემებზე იმუშაონ.
  • პარტიაში ამტკიცებენ, რომ მათ წინადადების გაზიარების შემთხვევაში, სახალხო დამცველის არჩევა ფართო კონსენსუსის კარგი მაგალითი გახდება.

გირჩის განცხადებით, ადამიანს ეკუთვნის საკუთარი სხეული და მისი ფუნდამენტური უფლებებია სიცოცხლის, თავისუფლებისა და საკუთრების უფლება.

  • ამბობენ, რომ ადამიანთა სხვადასხვა ჯგუფისთვის "ხელოვნურად მოგონილი "უფლებები", რომლებიც ამ სამეულთან მოდის წინააღმდეგობაში, თავისი შინაარსით, პრივილეგიებია და არა უფლებები.
  • "ციხეში მყოფი ადამიანები ყველაზე დაუცველები არიან სახელმწიფოს წინაშე. პატიმრების გარდა, უამრავი ადამიანი იმყოფება პირობითი მსჯავრის ქვეშ და ჩამორთმეული აქვს ნორმალური ცხოვრებისთვის აუცილებელი უფლებები.
  • ჩვენი კანდიდატის არჩევის შემთხვევაში, სახალხო დამცველი და მისი აპარატი კონცენტრირებული იქნება მართლმსაჯულებისა და პენიტენციურ სისტემებში ადამიანის უფლებების დაცვის ეფექტიან საპარლამენტო კონტროლზე".