როგორც The Guardian წერს, უკრაინის საჰაერო თავდაცვის სისტემის მიერ მოგერიებული ერთ-ერთი რუსული რაკეტა მოლდოვის ტერიტორიაზე ჩამოვარდა.

რატომ არის მნიშვნელოვანი: რაკეტა უკრაინასთან საზღვრის მახლობლად მდებარე სოფელ ნასლავჩიში ჩამოვარდა.

  • დაზიანებულია რამდენიმე საცხოვრებელი სახლი, ამ დროისთვის მსხვერპლი არ არის.

დეტალები: რუსეთმა უკრაინის მასშტაბით მორიგი მასიური სარაკეტო თავდასხმები განახორციელა, რამაც მთელ რიგ რეგიონებში ელექტროენერგიისა და წყლის შეწყვეტა გამოიწვია.

  • უკრაინის საჰაერო სარდლობის განცხადებით, დღეს დილით, რუსეთმა უკრაინის კრიტიკულად მნიშვნელოვანი ინფრასტრუქტურის ობიექტებზე რამდენიმე ტალღად მიიტანა სარაკეტო იერიში.
  • მათი თქმით, ოკუპანტებმა გაუშვეს 50-ზე მეტი რაკეტა, საიდანაც 44 გაანადგურეს.

მოლდოვის შსს-ს განცხადებაში, ვკითხულობთ, რომ უკრაინის ცნობით, რუსეთი თავს დაესხა უკრაინის ტერიტორიაზე მყოფ დნესტრის ჰიდროელექტროსადგურს, რომელიც ნასლავჩას ჰიდროელექტროსადგურიდან 10 კილომეტრში მდებარეობს.