ამის შესახებ ირაკლი ღარიბაშვილმა დღეს, 31 ოქტომბერს გამართულ მთავრობის სხდომაზე ისაუბრა.

რატომ არის მნიშვნელოვანი: როგორც ის ამბობს, ინვესტორებს ახალ სქემას შესთავაზებენ, შედეგად კი ენერგეტიკის სფეროში მომდევნო 3 წელში 3 მილიარდი დოლარის ინვესტიციას ელიან.

• ასევე, აცხადებს, რომ სქემა არის "შეთანხმებული, გავლილი" და რამდენიმე დღეში ოფიციალური სახე მიეცემა.
• პრემიერმინისტრის თქმით, საქართველოს გააჩნია, საკმაოდ დიდი რესურსები, განსაკუთრებით კი ჰიდრორესურსები, ამიტომ, მათ "მაქსიმალურად გონივრული გამოყენება სჭირდება".
• ის ამბობს, რომ ეს მათი მთავარი პრიორიტეტია და ბოლო თვეების განმავლობაში აქტიური კონსულტაციები ჰქონდათ საერთაშორისო სავალუტო ფონდთანაც.

დეტალები: ღარიბაშვილის თქმით, რომ ბოლო წლებში ე.წ. გარანტირებული შესყიდვის სქემა შეჩერებული იყო და დაახლოებით 800 მგვტ-მდე ჰესებზე მემორანდუმებია გაცემული.

• "თუმცა, მიუხედავად იმისა, რომ ზოგიერთმა დაიწყო მშენებლობაც, კონტრაქტები არ არის გაფორმებული, ეს არის ერთი საკითხი".
• მეორე საკითხად ღარიბაშვილმა "ახალი პროექტების ბუნდოვანი ბედი" დაასახელა და თქვა, რომ ზოგადად, ინვესტორებს სჭირდებოდათ მეტი სიცხადე.

ღარიბაშვილის შეთავაზება: მისი თქმით, სახელმწიფო ინვესტორს ელექტროსადგურების ოპერირებაში გაშვებიდან 15 წლის განმავლობაში ფასთაშორის სხვაობის ე.წ. CFD ხელშეკრულებით მხარდაჭერას შესთავაზებს.

• როგორც ის ამბობს, ახალი სქემა აუქციონის წესით მომდევნო სამი წლის განმავლობაში ჯამურად 1 500 მგვტ სიმძლავრის ელექტროსადგურების მშენებლობის ხელშეწყობას მოიცავს.
• მისივე თქმით, მხოლოდ 1 500 მგვტს-ის სიმძლავრის მშენებლობის ხელშეწყობით, დაახლოებით 2,2 მილიარდ დოლარის ინვესტიციას ელოდებიან, ამას კი დაემატება 800 მგვტ-ის და კიდევ სხვა მსხვილი პროექტები, რომელზეც ცალკე იმსჯელებენ.
• "მომდევნო სამი წლის განმავლობაში იმ დათქმით, რომ ყველა ეს პროექტი იქნება გაფორმებული და გაშვებული მინიმუმ 3 მილიარდი დოლარის ინვესტიციას ველოდებით ენერგეტიკის სფეროში".

ბოლოს კი თქვა, რომ "ქვეყანაში არსებულ ეკონომიკურ ზრდას" გამომუშავებული ელექტროენერგია ვერ ეწევა და "ეს ყველაფერი წარმოშობს სირთულეებს", ამიტომ ახალი ჰესების მშენებლობა უაღრესად მნიშვნელოვანია.

არქივიდან: 2021 წლის 22 სექტემბერს ცნობილი გახდა, რომ ნამახვანჰესის ინვესტორმა, ენკამ საქართველოს მთავრობასთან ხელშეკრულების გაწყვეტის გადაწყვეტილება მიიღო და მიზეზად კონტრაქტის პირობების დარღვევა დაასახელა.

• ექსპერტები ამბობდნენ, რომ თუ კომპანიასა და მთავრობას შორის საარბიტრაჟო დავა დაიწყება, ქვეყანას ასეულობით მილიონი დოლარის გადახდა მოუწევდა.
• ხელშეკრულების გაწყვეტას წინ ჰესის მშენებლობის მოწინააღმდეგეთა პროტესტი უძღოდა.