ამის შესახებ კანადის პრემიერმინისტრმა, ჯასტინ ტრუდომ ისაუბრა.

რატომ არის მნიშვნელოვანი: პუტინის რეჟიმზე ზეწოლის გაზრდის მიზნით, კანადა აპირებს მიიღოს ახალი ზომები, რომლებიც კიდევ უფრო გააძლიერებს უკრაინის მხარდაჭერას.

  • სანქციები შეეხება ოკუპანტი სახელმწიფოს იმ მაღალჩინოსნებს, რომლებიც უკრაინაში შეჭრასთან არიან დაკავშირებულები.
  • კანადამ უკრაინის 4 ოკუპირებულ რეგიონში ჩატარებული ე.წ. რეფერენდუმის გამო რუსეთს სანქციები აქამდეც დაუწესა.

დეტალები: პრემიერმინისტრის გადაწყვეტილებით, სანქციები დაუწესდება რუსეთის 35 მაღალჩინოსანს. მათ შორის, გაზპრომისა და მისი შვილობილი კომპანიებიდან 6 სუბიექტს.

  • ასევე, იგეგმება სანქციების დაწესება რუსეთის მართლმსაჯულებისა და უსაფრთხოების სექტორის წევრებზე, მათ შორის, პოლიციელებზე, გამომძიებლებზე, პროკურორებსა და მოსამართლეებზე.
  • "კანადა გააგრძელებს ურყევ მხარდაჭერას უკრაინისადმი, რადგან ის იცავს თავის სუვერენიტეტს, ტერიტორიულ მთლიანობასა და დამოუკიდებლობას".
  • "ჩვენ გავაგრძელებთ ჩვენს ხელთ არსებული ყველა ინსტრუმენტის გამოყენებას უკრაინის მთავრობისა და ხალხის მხარდასაჭერად, ასევე — პასუხისმგებლობის დაკისრებას რუსეთისთვის მისი სასტიკი და გაუმართლებელი შეჭრის გამო", — ნათქვამია განცხადებაში.

გარდა ამისა, ჯასტინ ტრუდოს გადაწყვეტილებით, კანადა გამოყოფს 15 მილიონი დოლარის დახმარებას, რაც უკრაინის ტერიტორიების განაღმვას მოხმარდება.