ინფორმაციას ამის შესახებ აშშ-ის სახელმწიფო დეპარტამენტის ვებგვერდზეა გამოქვეყნებული.

რატომ არის მნიშვნელოვანი: დეპარტამენტის განცხადებით, შეერთებული შტატები გააგრძელებს მოლდოვის დემოკრატიის მხარდაჭერას და კორუფციის წინააღმდეგ ბრძოლას.

  • სანქციები დაუწესდა ოლიგარქებს — ვლადიმირ პლახოტნიუკს, ილან შორს, ასევე 19 სხვა ფიზიკურ პირსა და ორგანიზაციას.

დეტალები: სახელმწიფო დეპარტამენტის განცხადებით, სანქციების დაწესებით მათ რეაგირება მოახდინეს კორუფციასა და არჩევნებში ჩარევაზე.

  • მათი განცხადებით, ვლადიმერ პლახოტნიუკი პირდაპირ თუ ირიბად ჩართულია კორუფციაში და გავლენას ახდენდა, როგორც არჩევნების შედეგებზე, ასევე სასამართლოს გადაწყვეტილებებზეც.
  • რაც შეეხება ილან შორის, დეპარტამენტის განცხადებით, ის მოლდოვის პარლამენტის გაკონტროლებასა და რუსეთისთვის ხელსაყრელი კანონების მხარდაჭერას ცდილობდა.
  • ილან შორისი დაკავებული იყო ფულის გათეთრებისა და გაფლანგვის ბრალდებით, ის დაკავშირებული იყო 2014 წელს მოლდოვის ბანკებიდან 1 მილიარდი დოლარის ქურდობაში.

გარდა ამისა, აშშ-მა სანქციები დაუწესა 7 ფიზიკურ პირს და 12 ორგანიზაციას, რომლებიც მონაწილეობდნენ კრემლის მცდელობებში ჩაერიოს მოლდოვას არჩევნებში.

  • "დღეს დაწესებული სანქციები ავლენს არა მხოლოდ რუსეთის ფარულ სტრატეგიას მოლდოვაში, არამედ აჩვენებს, თუ როგორ ძირს უთხრის კორუფცია კანონის უზენაესობას";
  • "რუსული გავლენის ოპერაციები ცდილობენ გამოიყენონ სისუსტეები სამიზნე ქვეყნებში, რათა მოხდეს მათი შიგნიდან დესტაბილიზაცია", — ნათქვამია დეპარტამენტის განცხადებაში.

მაია სანდუ: მოლდოვის პრეზიდენტის განცხადებით, ეს მნიშვნელოვანი ნაბიჯია მოლდოვაში კორუფციის წინააღმდეგ ბრძოლისთვის. მან მადლობა გადაუხადა აშშ-ს ძლიერი მხარდაჭერისთვის.

  • "იმედი მაქვს, რომ ეს სანქციები მაგალითი იქნება მოლდოვის სასამართლო სისტემისთვის, რომელმაც საბოტაჟი მოახდინა და აჭიანურებდა სისხლისსამართლებრივ დევნას", — ამბობს სანდუ.