პარლამენტში ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე სახალხო დამცველობის ერთ-ერთი კანდიდატი თინათინ ერქვანია წარსდგა.

რატომ არის მნიშვნელოვანი: ოლიგარქის განმარტების საკითხი საქართველოში განსაკუთრებით აქტუალური გახდა მას შემდეგ, რაც ევროკომისიის რეკომენდაციებში დეოლიგარქიზაციის პუნქტი გაჩნდა.

  • ოპოზიცია, საერთაშორისო პარტნიორების ნაწილი და სამოქალაქო საზოგადოება მიუთითებს, რომ ეს ქართული ოცნების დამფუძნებელს, ბიძინა ივანიშვილს ეხება.
  • თუმცა, მმართველი გუნდი ამას არ აღიარებს, ივანიშვილს მეცენატს უწოდებს, ოლიგარქად კი ფორმულას დამფუძნებელს, ყოფილ მინისტრს დავით კეზერაშვილს ასახელებს.
  • პრემიერმინისტრმა ევროკომისიის პრეზიდენტს წერილიც კი მისწერა, სადაც არწმუნებდა, რომ ივანიშვილი ოლიგარქი არ არის.

დეტალები: ქართული ოცნების დეპუტატმა, ანრი ოხანაშვილმა კანდიდატს ჰკითხა, მეცენატი შეიძლება თუ არა მიიჩნეოდეს ოლიგარქად, რასაც თინათინ ერქვანიამ ასე უპასუხა:

  • "მნიშვნელოვანია განვსაზღვროთ რა არის ტერმინი ოლიგარქი. მახსოვს, იურისტებთან მსჯელობისას მივედით იმ დასკვნამდე, რომ ეს არის კრიმინალური წარმომავლობის მქონე რესურსების მფლობელი პირი, რომელიც შეზრდილია სახელმწიფო ინსტიტუტებს. ეს არის რუსეთში სახეზე".
  • "ასეთი ტიპის ადამიანები საქართველოში შეიძლება არსებობდნენ. აი, მაგალითად, ბატონი დავით კეზერაშვილი რომ ავიღოთ, მე მგონია, რომ რაღაც დოზით ამ კრიტერიუმებს შესაძლოა აკმაყოფილებდეს იმიტომ, რომ არსებობს რაღაც კონკრეტული ქეისები".
  • "თუ ოლიგარქი არის ის, რაც აღვწერე, კრიმინალური წარმომავლობის ფული და ასევე ჩართული პოლიტიკაში და გადართული პოლიტიკურ პროცესებში, ბატონი ბიძინა ივანიშვილის საქმიანობაში ამას ვერ ვხედავ".