ამის შესახებ ინფორმაციას სოციალური სამართლიანობის ცენტრი ავრცელებს, რომელიც დაზარალებულთა ინტერესებს იცავს. წულუკიანს შრომითი დავა შესყიდვების სამსახურის ყოფილმა მთავარმა სპეციალისტმა, გუგა გოგაძემ მოუგო.

რატომ არის მნიშვნელოვანი: ეს პირველი შემთხვევა არაა, როდესაც სასამართლომ თეა წულუკიანის მიერ თანამშრომლის გათავისუფლება უკანონოდ მიიჩნია.

  • მას შემდეგ, რაც კულტურის მინისტრის პოზიციაზე თეა წულუკიანი დაინიშნა, არაერთი აქცია გაიმართა, სადაც აცხადებდნენ, რომ კულტურის სფეროდან თანამშრომლებს იდეოლოგიური მიუღებლობის გამო ათავისუფლებდნენ.
  • ცენტრი მიუთითებს, რომ გოგაძე ერთ-ერთია კულტურის სექტორის იმ 70-მდე თანამშრომელს შორის, რომლებიც თეა წულუკიანის კულტურის მინისტრის პოზიციაზე დანიშვნის შემდეგ, "მასობრივი საკადრო წმენდის მსხვერპლი გახდნენ".

დეტალები: ორგანიზაციის ინფორმაციით, 26 ოქტომბერს სააპელაციო გააუქმა საქალაქო სასამართლოს გადაწყვეტილება, რომელმაც გოგაძეს მოთხოვნები არ დაუკმაყოფილა.

  • სასამართლომ ბათილად ცნო კულტურული მემკვიდრეობის დაცვის ეროვნული სააგენტოს გენერალური დირექტორის 2022 წლის იანვრის ბრძანება, გოგაძის თანამდებობიდან გათავისუფლების შესახებ.

ამასთან, სასამართლომ სააგენტოს გათავისუფლებული თანამშრომლისთვის კომპენსაციის სახით, გათავისუფლების დღიდან გადაწყვეტილების აღსრულებამდე განაცდურის ხელფასის ოდენობის თანხის გადახდა დაავალა.

  • ცენტრის თქმით, გოგაძე ითხოვდა კომპენსაციას იმისთვისაც, რომ ამ ეტაპზე მისი თანამდებობაზე აღდგენა შეუძლებელი იყო, მოთხოვნა კი სასამართლომ ნაწილობრივ დააკმაყოფილა და დამატებით, სააგენტოს 3 ათასი ლარის გადახდა დააკისრა.

მათივე თქმით, სოციალური სამართლიანობის ცენტრის წარმოებაში ამ ეტაპზე ამ ტიპის 10 საქმეა, რომელთაგან სასამართლო გადაწყვეტილებები მხოლოდ ორზეა გამოტანილი და ორივე შემთხვევაში გათავისუფლების ბრძანება ბათილად იცნო.

  • "მოპასუხეებს დაეკისრათ განაცდურის ანაზღაურება და სასამართლოს მიერ განსაზღვრული კომპენსაციის გადახდა".

განახლება: კულტურის სამინისტრო ამბობს, რომ ყოფილი თანამშრომლის მიერ სასამართლოს მოგებაზე ცნობა "მეტწილად არასწორია"