სახალხო დამცველობის კანდიდატმა, ანა აბაშიძემ ამის შესახებ პარლამენტში ისაუბრა.

რატომ არის მნიშვნელოვანი: აბაშიძე ომბუდსმენობის 19 კანდიდატს შორის ერთ-ერთია. ამ კვირაში ყველა მათგანს უნდა მოუსმინონ, პირველი კი სწორედ ანა აბაშიძეა.

  • ის სახალხო დამცველის კანდიდატად არასამთავრობო სექტორმა წარადგინა, სამუშაო ჯგუფმა კი ყველაზე მაღალი ქულით შეაფასა.

დეტალები: ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ აბაშიძეს ჰკითხა, მიიჩნევს თუ არა საქართველოს ყოფილ პრეზიდენტ მიხეილ სააკაშვილს პასუხისმგებლად ადამიანის უფლებების მასობრივ დარღვევებზე.

  • სარჯველაძის კითხვის პასუხად აბაშიძემ თქვა, რომ მიიჩნევს და ერთ-ერთი შემთხვევაც გაიხსენა, თუ რატომ თვლიდა, რომ სააკაშვილი ადამიანის უფლებების დარღვევაზე პასუხისმგებელია.
  • "[სააკაშვილმა] ჩემი აზრით, სრულიად სამარცხვინოდ პარლამენტის ტრიბუნიდან... პატარა ბიჭს, მიხეილ ალექსიძეს, 53-ე სკოლის მოსწავლეს, მე-8 კლასელს, აი ამ ადამიანს მიხეილ სააკაშვილმა 53-ე სკოლის დირექტორმა, მაშინდელმა განათლების მინისტრმა და ა.შ. თუმცა უშუალოდ მიხეილ სააკაშვილმა ხულიგანი ეძახა".
  • "მე მაშინ ვმუშაობდი სახალხო დამცველთან და მათ შორის, მე ვიყავი ავტორი ამ ბავშვის საქმის პრაქტიკულად გამოძიების და მაშინდელმა სახალხო დამცველმა რეკომენდაციაც გასცა და მიხეილ სააკაშვილის ქცევა ძალიან ნეგატიურად შეაფასა".
  • "ეს ერთი შემთხვევაა, მე შემიძლია ბევრი სხვა შემთხვევა ჩამოგითვალოთ და თუ გადახედავთ 2013 წლამდე სახალხო დამცველის ანგარიშებს, ჩემს მეგობრებთან ერთად, მე ვარ თანაავტორი და ყველა სიტყვაზე პასუხს ვაგებ დღესაც".

გარდა ამისა, სარჯველაძემ დასვა კითხვა, უფლებათა თვალსაზრისით, "იმ ხანიდან, ამ ხანამდე ვითარება შეცვლილია"?.

  • "ბოლო 10 წელი არსებითად განსხვავებულია ადამიანის უფლებების თვალსაზრისით ეს ჩვენი დამსახურებაც არის ყველას ერთად, მაგრამ ამავდროულად არის ლოგიკა, რომ პროგრესი არის იმთავითვე ნაგულისხმევი. ჩვენ უკან ვერ წავალთ", — თქვა აბაშიძემ კითხვის პასუხად.