ამის შესახებ ოპოზიციის წევრებმა საკრებულოში ბრიფინგი გამართეს.

რატომ არის მნიშვნელოვანი: 13 ოქტომბერს ვაკის პარკის შადრევანში ჩასულ ბავშვებს დენმა დაარტყა. 13 წლის მოზარდი გარდაიცვალა, ხოლო 2 ბავშვი დაშავდა.

  • ამ საქმეზე მიმდინარე გამოძიების ფარგლებში 9 პირი დააკავეს: ექსპერტები, ელექტროშემდუღებლები, გრინსერვისის დირექტორი და მერიის გარემოს დაცვის სამსახურის უფროსის მოადგილე.
  • დაკავებულებს ბრალი სხვადასხვა მუხლით აქვთ წარდგენილი, მათ შორის, სამსახურებრივ გულგრილობაზე, რამაც სიცოცხლის მოსპობა გამოიწვია, ყალბი დოკუმენტების დამზადებაში წაქეზებაზე, დამზადებასა და გამოყენებაზე.

დეტალები: ოპოზიციაში ამბობენ, რომ საკრებულოს აქვს უფლება, დაიბაროს მერი და მას კითხვები დაუსვას, ხოლო მერი ვალდებულია, მივიდეს და ყველა კითხვას გასცეს პასუხი.

  • "ნუ ჩავთვლით ჩვენს ხალხზე, ჩვენს ბავშვებზე და მოქალაქეებზე ზრუნვას პოლიტიკურ სპეკულაციად, იმიტომ, რომ ეს არის ჩვენი ვალდებულება თითოეული ჩვენგანის და რასაკვირველია, ეს არის მერის ვალდებულება".
  • "ჩვენ გელოდებით, ბატონო კახა, გელოდებით საკრებულოში, რათა იმ კითხვებს გაეცეს პასუხი, რომ მშობლებს ჰქონდეთ სიმშვიდე, რასაც ნამდვილად იმსახურებენ ჩვენი მოქალაქეები".
  • ოპოზიციაში აცხადებენ, რომ რიგგარეშე სხდომის გასამართად და კალაძის დასაბარებლად საჭირო რაოდენობის ხელმოწერები უკვე შეაგროვეს.

საპასუხოდ, კახა კალაძემ ჯერ კიდევ გუშინ, 24 ოქტომბერს თქვა, რომ საკრებულოში მისვლას თავად გადაწყვეტს, და მივა, "როცა საჭირო იქნება", ასევე, გასცემს ყველანაირ კითხვას პასუხის, "როცა ამის დრო და აუცილებლობა იქნება".

  • "მე არ მინდა უბრალოდ, გამომივიდეს არასწორად, რადგან გამოძიება მიმდინარეობს და ჩემი რაიმე განცხადებებით ხელი შევუშალო გამოძიებას", — აღნიშნა მან.