რუსმა ოკუპანტებმა ხერსონში რუსი გენერლების, ალექსანდრე სუვოროვისა და ფედორ უშაკოვის ძეგლები დაშალეს და გაქცევისას თან წაიღეს. ინფორმაციას რუსული პროპაგანდისტული წყაროები ავრცელებენ.

რატომ არის მნიშვნელოვანი: 18 ოქტომბერს, ხერსონის ოლქში მოსკოვის მიერ დაყენებულმა რწმუნებულმა ვლადიმერ სალდომ მოსახლეობის სავალდებულო ევაკუაცია გამოაცხადა.

  • რუსეთის ჯარების სარდალი უკრაინაში, სერგეი სოროვიკინი ამტკიცებდა, თითქოს ხერსონში უკრაინის მასიურ იერიშს ელიან, შედეგად მოსახლეობის მასიური "ორგანიზებული გადაადგილება" დაიწყეს.
  • უკრაინამ არაერთხელ განაცხადა, რომ ოკუპანტები ცდილობენ მათი კულტურული მემკვიდრეობა გაანადგურონ.

დეტალები: რუსების განმარტებით, მოიპარეს ძეგლები, რათა "უკრაინის შეიარაღებული ძალების მიერ დაბომბვისგან უნიკალური ხელოვნების ნიმუშები შეენარჩუნებინათ". ეს მაშინ, როცა თავად აქტიურად ბომბავენ უკრაინის ისტორიულ ძეგლებს.

  • სუვოროვის ბიუსტი ხერსონში 1950 წელს დაიდგა მისი გარდაცვალების 150 წლისთავის აღსანიშნავად.
  • ადმირალ უშაკოვის ქანდაკება 1957 წელს ამავე სახელწოდების გამზირზე დამონტაჟდა.

უკრაინის კულტურის მინისტრმა "მადლობა გადაუხადა" მათ, რომ რუსიფიკაციის შედეგებთან გამკლავებაში ეხმარებიან, მაგრამ აღნიშნა, რომ ძეგლების აღების საკითხები, უკრაინის ხელისუფლებამ კანონიერი გზებით უნდა მოაგვაროს.