გენერალური პროკურატურის სექსუალური ძალადობის საქმეების პროკურორის, ირინა დიდენკოს განცხადებით, ძალადობაში ეჭვმიტანილი 5 პირი უკვე იდენტიფიცირებულია, 2 მათგანის საქმეს კი სასამართლო განიხილავს.

დეტალები: პროკურორის ინფორმაციით, უკრაინაში რუსი ოკუპანტების სექსუალური ძალადობის შედეგად დაზარალებულთა ასაკი 4-დან 85 წლამდეა.

  • დიდენკოს განცხადებით, სექსუალური ხასიათის დანაშაულის სპეციფიკიდან გამომდინარე რთულია განისაზღვროს რომელი სქესის ადამიანები დაზარალდნენ უფრო მეტად, მსხვერპლის რაოდენობა კი საკმაოდ დიდია.
  • უკრაინის შინაგან საქმეთა მინისტრის მოადგილის, კატერინა პავლიჩენკოს ინფორმაციით, აღძრულია 43 სისხლის სამართლის საქმე, მათ შორის არიან ისეთებიც, რომლებსაც ჰყავთ რამდენიმე მსხვერპლი.
  • რუსი სამხედროების მიერ ჩადენილი სექსუალური ხასიათის დანაშაულები დაფიქსირებულია ოკუპანტებისგან განთავისუფლებულ ყველა რეგიონში.

რატომ არის მნიშვნელოვანი: სამხედროების მიერ გაუპატიურება და სექსუალური ძალადობა ომის დანაშაული და საერთაშორისო ჰუმანიტარული სამართლის დარღვევაცაა.

  • გაუპატიურება ხშირად ომის ფარულ დანაშაულად მოიხსენიება, რაც ართულებს მის იდენტიფიცირებას და აყოვნებს სამართლებრივ რეაგირებას.
  • ასეთ ქმედებაში ბრალდებული ჯარისკაცები ტყვედ ჩავარდნის შემთხვევაში საერთაშორისო სასამართლოს წინაშე აღმოჩნდებიან.
  • მათ მეთაურებს ასევე ეკისრებათ სისხლის სამართლის პასუხისმგებლობა, თუ დადასტურდა რომ მათთვის ცნობილი იყო ძალადობის ფაქტების შესახებ და არაფერი გააკეთეს მათ აღსაკვეთად.
  • "გაუპატიურება, მკვლელობა და სხვა ძალადობრივი ქმედებები რუსული ძალების პატიმრობაში მყოფი ტყვეების მიმართ გამოძიებულ უნდა იქნეს როგორც ომის დანაშაული", — განაცხადა Human Right Watch-ის ევროპისა და ცენტრალური აზიის დირექტორმა, ჰიუ ვილიამსონმა.

ფაქტები: სრულმასშტაბიანი ომის დაწყების შემდეგ, მუდმივად ვრცელდება ინფორმაცია რუსი სამხედროების მიერ განხორციელებული სექსუალური დანაშაულების შესახებ, მათ შორის:

  • 44 წლის ნატაშამ და 42 წლის ვიკამ კიევის მახლობლად მდებარე სოფლიდან, SKY NEWS-ს თან გაიხსენეს ოკუპანტების მხრიდან ძალადობის შემზარავი ისტორიები.
  • კიევის რეგიონში 11 წლის ბიჭი დედის თვალწინ გააუპატიურეს — როდესაც ფსიქოლოგმა მასთან მუშაობა დაიწყო, ბიჭი მხოლოდ შავ ფერებში ხატავდა.
  • კიევში, ბუჩას რეგიონში 14 წლის გოგო ხუთმა ოკუპანტმა გააუპატიურაა –— შემთხვევის შესახებ მშობლების თანხმობით ფსიქოლოგმა ალექსანდრა კვიტკომ განაცხადა.