მოსამართლე წევრობის ადგილები ვაკანტური მას შემდეგ გახდა, რაც გიორგი გოგინაშვილმა და გოჩა აბუსერიძემ პირადი განცხადების საფუძველზე საბჭო დატოვეს.

რატომ არის მნიშვნელოვანი: ლევან მურუსიძე და დიმიტრი გვრიტიშვილი ე.წ. სასამართლო კლანის გავლენიან წევრებად მოიაზრებიან.

  • არასამთავრობო სექტორმა, საერთაშორისო პარტნიორებმა და ოპოზიციამ არაერთხელ აღნიშნა, რომ მოსამართლეთა ნაწილი გადაწყვეტილებებს მმართველი გუნდის პოლიტიკური დაკვეთით იღებს.

დეტალები: დიმიტრი გვრიტიშვილის კანდიდატურა მოსამართლეებმა წარადგინეს, ხოლო ლევან მურუსიძემ საკუთარი თავი თავად დაასახელა.

  • როგორც საზოგადოებრივი მაუწყებელი წერს, მოსამართლეთა კონფერენციაზე ლევან მურუსიძეს 268 ხმით, ხოლო დიმიტრი გვრიტიშვილი 267 ხმით აირჩიეს.
  • იუსტიციის უმაღლესი საბჭოს მოსამართლე წევრები თანამდებობაზე 4 წლის ვადით ინიშნებიან.

მურუსიძემ არჩევამდე ჟურნალისტებთან თქვა, რომ მის სახელს "არასწორ კონტექსტში" იყენებენ.

  • "მე რადგანაც ვიყავი რიგითი მოსამართლე და არ მქონდა საშუალება, პასუხი გამეცა, ბევრი ფიქრის შემდეგ გადავწყვიტე, რომ თუ პრეტენზია ექნება ვინმეს, რამე, მე თვითონ გავცემ პასუხს", — აცხადებს მურუსიძე.
  • ამბობს იმასაც, რომ იბრძოლებს "სასამართლოს დამოუკიდებლობისთვის".

არასამთავრობო სექტორი: საქართველოს ახალგაზრდა იურისტთა ასოციაციის დემოკრატიული ინსტიტუტების მხარდაჭერის პროგრამის დირექტორი ნანუკა ყრუაშვილი აცხადებს, რომ სასამართლოში კლანს მნიშვნელოვნად აქვს გადგმული ფესვები.

  • "მურუსიძის დაბრუნება საბჭოში მოასწავებს იმას, რომ მათ უნდათ ის სკანდალური მოვლენები, რაც სასამართლოს გარშემო დატრიალდა, გაანეიტრალონ და უფრო მეტი კონტროლის ქვეშ მოაქციონ", — თქვა მან ჟურნალისტებთან.

არამოსამართლე წევრები: იუსტიციის უმაღლესი საბჭოს 5 არამოსამართლე წევრის ასარჩევ კონკურში 32 კანდიდატია წარდგენილი.