ამის შესახებ მან ფეისბუქგვერდზე დაწერა.

რატომ არის მნიშვნელოვანი: ცოტა ხნის წინ სასამართლომ ბასილაშვილი უდანაშაულოდ ცნო და ყველა ეპიზოდში გაამართლა.

  • ბრალდების მხარე ნიკოლოზ ბასილაშვილს დაზარალებულის მიმართ ფიზიკური ძალადობის 4 ეპიზოდს ედავებოდა.
  • პროკურატურა აცხადებს, რომ კატეგორიულად არ ეთანხმება სასამართლოს გადაწყვეტილებას და მას სააპელაციოში გაასაჩივრებს.

დეტალები: დოროყაშვილი ამბობს, სამართლიანობისთვის ბოლომდე იბრძოლებს, რადგან მოსამართლე მხოლოდ ბრალდებულის 10-წუთიან რეპლიკას დაეყრდნო და ყველა ფაქტზე თვალი დახუჭა.

  • მისივე თქმით, გეგმავს, ეს საქმე სტრასბურგსა და გაეროში გაასაჩივროს.
  • "ამ ქეისს გავხდით მაგალითად, თუ როგორ მუშაობს საქართველოში სასამართლო სისტემა", — დაწერა მან.
  • დოროყაშვილის თქმით, ის ფაქტი, რომ მან ვერ მოიგო პირდაპირი და ირიბი მტკიცებულებებით გამყარებული საქმე, ძალადობის მსხვერპლ ქალებს კიდევ უფრო უიმედო მდგომარეობაში აყენებს.
  • "ამ ქალბატონმა დღეს განაჩენი გამოუტანა მთელი საქართველოს ქალებს. ამით მან თქვა, რომ არაფერი გეშველებათ, ძალადობაში ამოგხდებათ სული".
  • ამბობს, რომ იბრძოლებს ძალადობაგამოვლილი ყველა ქალისთვის და მათთვის, ვინც ახლაც იმყოფება ძალადობის ქვეშ.
  • "როცა თავდებით გამოშვებული ქმრები და ყოფილი ქმრები ცოლებს ხოცავენ, გამართლებულები ყელს ჭრიან ცოლებს, ეს რას ნიშნავს?! ეს არ მიანიშნებს ქართული, სტერეოტიპებით, ნაცნობობით და გავლენებით მიღებულ გადაწყვეტილებებზე?! ეს არ გვიჩენს განცდას, რომ საქართველოში სასამართლო კლავს ქალებს", — წერს დოროყაშვილი.

სასამართლოს გადაწყვეტილება: ბასილაშვილს გაამართლეს სისხლის სამართლის კოდექსის 126-ე პრიმა მუხლის პირველი ნაწილით, სისტემატური სიტყვიერი შეურაცხყოფის ეპიზოდში.

  • ასევე, ამავე მუხლით, 2018 წლის 28 აგვისტოს ეპიზოდში და 126-ე მუხლის პირველი ნაწილით, 2019 წლის 30 აპრილის ეპიზოდში.
  • გარდა ამისა, მოსამართლე ხარჩილავამ ბასილაშვილი უდანაშაულოდ ცნო სსკ-ის 126-ე მუხლის მეორე ნაწილის ბ ქვეპუნქტით. საუბარია 2020 წლის 21 მაისის ეპიზოდზე.

ამასთან, სასამართლოს გადაწყვეტილებით გაუქმდა თბილისის საქალაქო სასამართლოს 2020 წლის 24 მაისის განჩინებით ბასილაშვილის მიმართ აღკვეთის ღონისძიება გირაო.

  • "გირაო შემტანს განაჩენის აღსრულებიდან 1 თვის ვადაში სრულად დაუბრუნდეს გირაოს სახით შეტანილი ფულადი თანხა", — თქვა ხარჩილავამ.
  • "ბასილაშვილს უფლება აქვს აუნაზღაურდეს მიყენებული ზიანი".

პროკურატურა აცხადებს, რომ კატეგორიულად არ ეთანხმება სასამართლოს გადაწყვეტილებას და მას სააპელაციოში გაასაჩივრებს.