გადაწყვეტილება მოსამართლემ, ხათუნა ხარჩილავამ დღეს, 21 ოქტომბერს გამოაცხადა.

სასამართლოს გადაწყვეტილება: ბასილაშვილს გაამართლეს სისხლის სამართლის კოდექსის 126-ე პრიმა მუხლის პირველი ნაწილით, სისტემატური სიტყვიერი შეურაცხყოფის ეპიზოდში.

• ასევე, ამავე მუხლით, 2018 წლის 28 აგვისტოს ეპიზოდში და 126-ე მუხლის პირველი ნაწილით, 2019 წლის 30 აპრილის ეპიზოდში.
• გარდა ამისა, მოსამართლე ხარჩილავამ ბასილაშვილი უდანაშაულოდ ცნო სსკ-ის 126-ე მუხლის მეორე ნაწილის ბ ქვეპუნქტით. საუბარია 2020 წლის 21 მაისის ეპიზოდზე.

ამასთან, სასამართლოს გადაწყვეტილებით გაუქმდა თბილისის საქალაქო სასამართლოს 2020 წლის 24 მაისის განჩინებით ბასილაშვილის მიმართ აღკვეთის ღონისძიება გირაო.

• "გირაო შემტანს განაჩენის აღსრულებიდან 1 თვის ვადაში სრულად დაუბრუნდეს გირაოს სახით შეტანილი ფულადი თანხა", — თქვა ხარჩილავამ.
• "ბასილაშვილს უფლება აქვს აუნაზღაურდეს მიყენებული ზიანი".

პროკურატურა აცხადებს, რომ კატეგორიულად არ ეთანხმება სასამართლოს გადაწყვეტილებას და მას სააპელაციოში გაასაჩივრებს.

რატომ არის მნიშვნელოვანი: ჩოგბურთელი ნიკოლოზ ბასილაშვილი პოლიციამ ყოფილ ცოლზე ძალადობის ბრალდებით 2020 წლის მაისში დააკავა.

• სასამართლომ მას აღკვეთი ღონისძიების სახით 100 000-ლარიანი გირაო შეუფარდა და გაათავისუფლა.
• ბრალდების მხარე ნიკოლოზ ბასილაშვილს დაზარალებულის მიმართ ფიზიკური ძალადობის 4 ეპიზოდს ედავებოდა.
• მათ შორის, იყო ფსიქოლოგიური, ფიზიკური და ეკონომიკური ძალადობის საქმეები.

სტრიქონებს შორის: მთავრობა და ქართული ოცნება 2021 წელს, როდესაც ბასილაშვილს უკვე ედავებოდნენ ოჯახში ძალადობას, ასპონსორებდნენ პოსტებს, რომლითაც ჩოგბურთელს გამარჯვებას ულოცავდნენ.

• ბრალდებული ბასილაშვილი ქართულმა ოცნებამ წინასაარჩევნო კამპანიაშიც ჩართო — 29 ოქტომბერს პარტიამ Facebook-ზე გამოაქვეყნა ვიდეო, სადაც ჩოგბურთელმა კახა კალაძეს მხარდაჭერა გამოუცხადა.

ნეკა დოროყაშვილი: დაზარალებულის გამოკითხვა საჯარო იყო, მან სასამართლოს მოუყვა ჩოგბურთელთან თანაცხოვრების დროს და შემდგომ მის მიმართ განხორციელებული ფსიქოლოგიური, ფიზიკური და ეკონომიკური ძალადობის ფაქტები.

• დოროყაშვილმა მოყვა, რომ საბანკო ბარათებს ნიკოლოზ ბასილაშვილი აკონტროლებდა და როდესაც კამათი მოუვიდოდათ, მათ უბლოკავდა.
• გარდა ამისა, დოროყაშვილი ამბობდა, რომ ბასილაშვილი მას "მახინჯს" უწოდებდა და ეუბნებოდა, რომ სამოდელო კარიერის აწყობას ვერ შეძლებდა.
• დოროყაშვილმა ფიზიკური ძალადობის არაერთ შემთხვევაზე ისაუბრა, პროკურატურამ კი ვიდეო წარადგინა.

ნიკოლოზ ბასილაშვილი: თავად ჩოგბურთელი წარდგენილ ბრალს არ ეთანხმებოდა და თავს სრულად უდანაშაულოდ მიიჩნევდა. მას საქმის დეტალებზე საჯაროდ არ უსაუბრია.

• გუშინ, 21 ოქტომბერს ბოლო სასამართლო სხდომაზე, იყო მოლოდინი, რომ საზოგადოება ნიკოლოზ ბასილაშვილის საბოლოო სიტყვას მოისმენდა, თუმცა მან სხდომის დახურვა მოითხოვა.

სასამართლო: დოროყაშვილის უფლებადამცველებმა გუშინ, 20 ოქტომბერს თქვეს, რომ შესვენებისას სხდომათა დარბაზში სასამართლოს თანამშრომლებმა ბასილაშვილთან ფოტოები გადაიღეს.

• ადვოკატის თქმით, სასამართლოს თანამშრომლების მხრიდან მსგავსი ქცევა არაეთიკურია — "დაზარალებულისთვის ასეთი გარემოება, როდესაც სასამართლოსგან ელოდება ობიექტურ, მიუკერძოებელ გადაწყვეტილებას და ხედავს, რომ ამ სასამართლოს თანამშრომლები ფოტოებს იღებენ ბრალდებულთან, ეს მინიმუმ, უნდობლობის განცდას აჩენს".

• მოსამართლის განცხადებით, "საბედნიეროდ გადაწყვეტილებას მოსამართლე იღებს და არა თანამშრომლები, მდივნები, თანაშემწეები".

• "პრობლემა რაში დაინახეთ? რომ გავაკეთოთ დაშვება, რომ ასეთ ქმედებას ნამდვილად ჰქონდა ადგილი. პრობლემა რაში გამოჩნდა, რა დაინახეთ პრობლემური", — თქვა მოსამართლემ.