ძალადობის სავარაუდო ფაქტზე მოსწავლის მშობელმა "ფორმულასთან" ისაუბრა.

რატომ არის მნიშვნელოვანი: საუბარია 7 წლის ბავშვზე ფსიქოლოგიურ და ფიზიკურ ძალადობაზე.

  • მშობლის ინფორმაციით, ფაქტზე რეაგირება არ ჰქონია არც სკოლის დირექციას და არც რესურსცენტრს.
  • შსს-მ კი გამოძიება თითქმის ერთი თვის შემდეგ, გუშინ, მას შემდეგ დაიწყო, რაც მომხდარი მედიამ გააშუქა.

დეტალები: დედა მედიასთან იხსენებს, რომ ის თავად შეესწრო შვილზე ძალადობის ფაქტს — ჯერ კლასელების, შემდეგ კი კლასის დამრიგებლის მხრიდან.

  • "ბავშვებს შორის მოხდა უთანხმოება. შემდეგ ჩემს შვილს წაუჭირეს ყელში მავთული ბავშვებმა, კლასელებმა. ბავშვი იძახის, რომ იხრჩობოდა".
  • "შემდეგ, საპასუხოდ, ჩემს შვილს, ვინც ყელში მავთული წაუჭირა, სახეში გაურტყამს. მასწავლებელი შეესწრო ამ სიტუაციას და მასწავლებელმა გაარტყა ნიკოლოზს სახეში", — ამბობს მშობელი.

ბრალდებას უარყოფენ კლასის დამრიგებელი და სკოლის დირექტორი.

  • როგორც ის "ფორმულასთან" ამბობს, როცა ფაქტით დაინტერესდა, უთხრეს, რომ მასწავლებელმა "ბავშვი უბრალოდ თავის ადგილზე დასვა".
  • "მე შევესწარი უკვე იმას, რომ ბავშვები აშველებდნენ. ავიყვანე საკლასო ოთახში, ყველა თავის ადგილას დავსვი", — იმავე ვერსიას ჰყვება დამრიგებელიც.

შსს ინფორმაციით, გამოძიება სისხლის სამართლის 126 მუხლით მიმდინარეობს, რაც ძალადობას გულისხმობს.