უკრაინის გენერალური შტაბის განცხადებით, ახალმობილიზებული რუსები ანექსირებულად გამოცხადებულ ხერსონის ოლქში დანაკარგების შესავსებად და ფრონტის ხაზზე ქვედანაყოფების გასაძლიერებლად ჩაიყვანეს.

რატომ არის მნიშვნელოვანი: 21 სექტემბერს პუტინმა ნაწილობრივი მობილიზაცია გამოაცხადა — მას შემდეგ რუსეთის მოქალაქეები ქვეყნის დატოვებას ცდილობენ.

  • მობილიზაციის პროცესი მნიშვნელოვანი დარღვევებით მიმდინარეობდა, რაც არაერთხელ გაშუქდა მედიაში — გამოუცდელი და გამოცდილი პირები შესაბამისი მომზადების, აღჭურვილობისა და ტექნიკის გარეშე გაუშვეს ფრონტზე.
  • ვრცელდება არაერთი ინფორმაცია ახალმობილიზებულების დაღუპვის შესახებ.
  • ხერსონი ახლა აქტიური საომარი მოქმედებების ზონაა, რაც ნიშნავს, რომ მობილიზებულები ყველაზე ცხელ წერტილში მიიყვანეს.

დეტალები: შეგახსენებთ, რომ მობილიზაციას მასობრივი პროტესტი მოჰყვა ქვეყნის მასშტაბით და ადგილობრივები შვილებისა და ქმრების სახლში დაბრუნებას ითხოვდნენ.

  • მათი ნაწილი აცხადებდა, რომ წაიყვანეს ისინიც, ვისაც კანონით მობილიზაცია არ ეხებოდა — რუსეთის პრეზიდენტი ითხოვს, რომ "უსაფუძვლოდ" გამოძახებულები სახლში დააბრუნონ.
  • რუსული სახელმწიფო მედიის მტკიცებით 10 000 მობილიზებული უკვე დააბრუნეს.

  • მედუზას ინფორმაციით, ომში გამოძახებულებისთვის მოხალისეები და სკოლის მოსწავლეები ქუდებს და წინდებს აგროვებენ, ზოგიერთ რეგიონში კი ხელისუფლება პირობას დებს, რომ გაწვეულებს თბილ ტანსაცმელს და საძილე ტომრებს გადასცემენ.

ბოლო ინფორმაცია ფრონტიდან: 24 საათის განმავლობაში რუსულმა ძალებმა განახორციელეს სულ მცირე 3 სარაკეტო და 24 საჰაერო თავდასხმა.

  • დაბომბეს 15 დასახლებული პუნქტი მრავალი სარაკეტო გამშვების გამოყენებით — სამიზნე ტერიტორიებს შორის იყო ხერსონის და ხარკოვის ოლქები.
  • უკრაინელმა სამხედროებმა ჩამოაგდეს 15 რუსული დრონი და გაანადგურეს ორი საზენიტო სარაკეტო სისტემა.
  • ლიკვიდირებულია კიდევ 100 რუსი ჯარისკაცი — 24 თებერვლიდან 20 ოქტომბრის ჩათვლით უკრაინელებმა სულ 66 650 რუსი ოკუპანტი გაანადგურეს.