დიდმა ბრიტანეთმა სანქციები ირანის 3 მოქალაქესა და კომპანია Shahed-ს დაუწესა.

რატომ არის მნიშვნელოვანი: რამდენიმე კვირაა, რაც რუსეთი უკრაინულ დასახლებებს ირანული კამიკაძე დრონებით ბომბავს. ამის დამადასტურებელი არაერთი ფოტო-ვიდეო კადრი გავრცელდა.

  • უკრაინის ომში უპილოტო თვითმფრინავების გამოყენება ზაფხულის შემდეგ გაიზარდა, როდესაც მოსკოვმა შაჰიდ-136 თვითმფრინავი ირანიდან შეიძინა (ამას ადასტურებს უკრაინა და აშშ).

დეტალები: ბრიტანეთის განცხადებით, დრონების მიწოდებით ირანი სარგებლობს უკრაინის მოქალაქეებზე რუსეთის სასტიკი თავდასხმებით. ზრდის ადამიანთა ტანჯვასა და კრიტიკული მნიშვნელობის ინფრასტრუქტურის ნგრევას.

  • "რუსეთიც და ირანიც არღვევენ გაეროს უშიშროების საბჭოს რეზოლუციას, რომელიც აკონტროლებს ამ იარაღის ირანიდან გადატანას".

  • სანქციები დაუწესდა 3 ადამიანს — ისინი პირადად არისნ პასუხისმგებელი რუსეთისთვის დრონების მიწოდებაზე. დიდმა ბრიტანეთმა მათ ქვეყანაში შესვლა აუკრძალა და ასევე გაყინა მათი აქტივები.

  • სანქციები დაუწესდა კომპანია Shahed-ს, რომელიც იმ დრონებს აწარმოებს, რასაც რუსეთი უკრაინაში თავდასხმებისთვის იყენებს. ბრიტანეთმა ქვეყანაში Shahed-ის აქტივები გაყინა.

აქამდე ირანს ე.წ. კამიკაძე დრონების გამო, სანქციებს ევროკავშირმა დაუწესა.

  • ევროკავშირის ქვეყნებმა გადაწყვეტილებით, აქტივები გაეყინათ სამ ფიზიკურ პირისა და ერთ სუბიექტს, რომლებიც პასუხისმგებელნი არიან რუსეთისთვის ე.წ. კამიკაძე დრონების მიწოდებაზე.

ირანი უარყოფს, რომ თეირანი რუსეთს დრონებს აწვდის. ირანის ელჩმა გაეროში ამირ საეიდ ირავანმა თქვა, რომ დასავლეთის ქვეყნები აწარმოებენ "დეზინფორმაციულ კამპანიას ირანის წინააღმდეგ".

  • ირანული დრონების გამოყენებას უარყოფს რუსეთიც. გაეროში რუსეთის მუდმივი წარმომადგენლის პირველმა მოადგილემ, უშიშროების საბჭოს სხდომის შემდეგ გამართულ პრესკონფერენციაზე ჟურნალისტებს განუცხადა, რომ უკრაინის წინააღმდეგ გამოყენებული ყველა უპილოტო თვითმფრინავი რუსულია და არა ირანული.

აშშ: სახელმწიფო დეპარტამენტის განცხადებით, აშშ ეთანხმება საფრანგეთისა და დიდი ბრიტანეთის შეფასებას, რომ დრონები გაეროს უშიშროების საბჭოს რეზოლუციას არღვევს.

  • აშშ-ის სახელმწიფო დეპარტამენტის სპიკერმა, ნედ პრაისმა 19 ოქტომბერს განაცხადა, რომ აშშ-ს აქვს მტკიცებულება, რომ რუსეთი იყენებს ირანულ თვითმფრინავებს უკრაინაზე თავდასხმისთვის.
  • აშშ ასევე გამოთქვამს მზადყოფნას, ირანს რუსეთისთვის უპილოტო საფრენი აპარატების მიწოდების გამო სანქციები დაუწესოს.