თბილისის საქალაქო სასამართლოში ძალადობაში ბრალდებული ჩოგბურთელის, ნიკოლოზ ბასილაშვილის საქმის ბოლო სასამართლო სხდომა იმართება.

რატომ არის მნიშვნელოვანი: სავარაუდოდ, ხვალ უნდა გამოცხადდეს ნიკოლოს ბასილაშვილის სისხლის სამართლის საქმეზე განაჩენი.

  • ბასილაშვილი ოჯახში ძალადობის საფუძველზე 2020 წლის მაისში დააკავეს;
  • მას ბრალი არასრულწლოვანი შვილის თანდასწრებით ყოფილ მეუღლეზე ფიზიკური ძალადობის ბრალდებით წარედგინა.

დეტალები: დასკვნით ეტაპზე ბრალდებულმა საბოლოო სიტყვით უნდა მიმართოს მოსამართლეს. ბასილაშვილის ადვოკატებმა კი დააყენეს შუამდგომლობა სხდომის ამ ნაწილის დახურვის შესახებ, რაც მოსამართლემ დააკმაყოფილა.

  • ადვოკატის თქმით, თუ სასამართლოს ეს ნაწილი იქნება საჯარო, უარყოფითად აისახება ბრალდებულზე, არასრულწლივანზე და პირადი ცხოვრების შესახებ ზოგად ინფორმაციებზე.

გარდა ამისა, დღეს, 20 ოქტომბერს ნეკა დოროყაშვილის უფლებადამცველებმა თქვეს, რომ სასამართლოს თანამშრომლებმა შესვენების დროს ბასილაშვილთან ფოტოები გადაიღეს.

  • "სასამართლოს თანამშრომლების მხრიდან მსგავსი ქცევა არაეთიკურია, როგორც მინიმუმ", — უთხრა ადვოკატმა მოსამართლეს.

არქივიდან: ნიკოლოზ ბასილაშვილს თბილისის საქალაქო სასამართლომ 100 ათასი ლარის ოდენობის გირაო შეუფარდა. ამასთან, შემაკავებელი ორდერი იყო გამოცემული როგორც ჩოგბურთელის, ისე მისი მშობლების მიმართ.

  • ნეკა დოროყაშვილმა სასამართლოში მოყვა, რომ საბანკო ბარათებს ნიკოლოზ ბასილაშვილი აკონტროლებდა და როდესაც კამათი მოუვიდოდათ, მათ უბლოკავდა.
  • გარდა ამისა, დოროყაშვილი ამბობს, რომ ბასილაშვილი მას "მახინჯს" უწოდებდა და ეუბნებოდა, რომ სამოდელო კარიერის აწყობას ვერ შეძლებდა.