ფინური მაუწყებელის ინფორმაციით, ფინეთის პრემიერმინისტრ სანა მარინსა და ქვეყნის პოლიტიკურ პარტიებს შორის შედგა შეთანხმება რუსეთის საზღვრის გასწვრივ კედლის მშენებლობასთან დაკავშირებით.

დეტალები: ფინეთის მესაზღვრეებმა გასულ თვეს შესთავაზეს მთავრობას სასაზღვრო გეგმა, რომელმაც დღეს პოლიტიკური ძალების მრავალპარტიული მხარდაჭერა მოიპოვა.

• სასაზღვრო დაცვის წინადადების თანახმად, ფინეთმა უნდა ააგოს კედელი რუსეთთან საზღვრის დაახლოებით 20%-ის გასწვრივ, რომელიც აღჭურვილი იქნება სენსორებით, კამერებით და მავთულით.
• "ჩვენ შევთანხმდით საჭიროებაზე", — ამბობდა მარინი შეხვედრის შემდეგ და აღნიშნავდა, რომ მთავრობა პარლამენტში კონკრეტულ წინადადებებს შეიტანდა.
• ფინური მედიის ცნობით, ქვეყანამ გამოყო 139 მილიონი ევრო პროექტის პირველი ეტაპისთვის და 6 მილიონი ევრო საწყისი "სატესტო განყოფილებისთვის".
• მესაზღვრეები კი ამბობენ, რომ პროექტის დასრულებას ოთხი წელი დასჭირდება და შესაძლოა, რამდენიმე ასეული მილიონი ევრო დაჯდეს.

ფინეთის პრემიერმინისტრის განცხადებით, ინიციატივა დაეხმარება მესაზღვრეებს სასაზღვრო კონტროლის შესასრულებლად.

• "ეს არის იმის უზრუნველყოფა, რომ საზღვრები კარგად არის კონტროლირებადი და ჩვენ შეგვიძლია პრევენციული გავლენის მოხდენა სიტუაციებზე, რომლებიც შეიძლება მოხდეს საზღვარზე."

რატომ არის მნიშვნელოვანი: ევროკავშირის წევრ ქვეყნებს შორის ფინეთს ყველაზე გრძელი, 1340-კილომეტრიანი საზღვარი აქვს რუსეთთან.

• პუტინის მიერ გამოცხადებული მობილიზაციის საპასუხოდ, ათასობით რუსი გარბის ქვეყნიდან სხვადასხვა მიმართულებით, მათ შორის ფინეთში.
• ჰელსინკი შეშფოთებას გამოთქვამს რუსეთთან აღმოსავლეთ საზღვრის ფართომასშტაბიანი უკანონო გადმოკვეთის გამო.
• ფინეთის საგარეო საქმეთა მინისტრის, პეკა ჰავისტოს ინფორმაციით, ამ დროისთვის 40 000 რუსი შევიდა ფინეთში — მისივე განცხადებით, სასამართლოს პრეროგატივაა განსაზღვროს რამდენად ლეგიტიმურია თავშესაფრის მიცემა იმ რუსებისთვის, რომლებიც ქვეყნიდან მობილიზაციას გამოექცნენ.

კონტექსტი: თურქეთი აჭიანურებს ფინეთის ნატოში წევრობის განაცხადის დამტკიცებას, რაც ფინეთის საგარეო საქმეთა მინისტრის შეფასებით, საფრთხეში აყენებს მთელ სკანდინავიურ რეგიონს.

• რუსეთის განცხადებაში ფინეთის ნატოსკენ სვლა აღწერილია, როგორც "რადიკალური ცვლილება ქვეყნის საგარეო პოლიტიკაში, რომელიც სერიოზულ ზიანს მიაყენებს რუსეთ-ფინეთის ურთიერთობებს, შედეგად რუსეთი იძულებული იქნება გადადგას საპასუხო ნაბიჯები, როგორც სამხედრო-ტექნიკური, ასევე სხვა ხასიათის, რათა გაანეიტრალოს ამისგან წარმოშობილი საფრთხეები".