ამის შესახებ განცხადება პარტიის ერთ-ერთმა ლიდერმა, ლევან იოსელიანმა გააკეთა.

რატომ არის მნიშვნელოვანი: მოქმედ სახალხო დამცველს, ნინო ლომჯარიას უფლებამოსილების ვადა 2022 წლის 8 დეკემბერს ეწურება.

  • სამუშაო ჯგუფმა სახალხო დამცველობის კანდიდატად წარდგენის მსურველი 19 პირი შეაფასა და შესაბამისი ქულები დაუწერა.

  • კომისიის შეფასებების შემდეგ, პარლამენტში წარმოდგენილ სუბიექტებს შესაძლებლობა აქვთ, კანდიდატები პარლამენტს 21 ოქტომბრამდე წარუდგინონ.

დეტალები: იოსელიანის თქმით, მათი პარტია კანდიდატებს "ფავორიტიზმით" ვერ წარადგენს და ამიტომ ყველა კანდიდატს თანაბარ საშუალებას აძლევენ, რომ პარლამენტს თავიანთი მოსაზრებები გააცნონ.

  • მისი თქმით, ყველა კანდიდატის მოსმენა იქნება პარლამენტში და ყველას სახელი და გვარი დადგება კენჭისყრაზე.
  • იოსელიანი აცხადებს, რომ ამის შემდეგ უკვე ჩვენი მოქალაქეები გაიგებენ, რომელმა დეპუტატმა ვის დაუჭირა მხარი — "კენჭისყრა არის ღია და ეს იქნება მაქსიმალურად გამჭვირვალე პროცესი".

შეფასების სამუშაო ჯგუფი: ომბუდსმენობის კანდიდატებიდან ყველაზე მაღალი შეფასება არასამთავრობო ორგანიზაციების მიერ წარდგენილმა კანდიდატმა, ანა აბაშიძემ მიიღო. მას ჯამში 321 ქულა აქვს.

  • NGO-ების მიერ წარდგენილი მეორე კანდიდატი, ნაზი ჯანეზაშვილი კი შეფასების მიხედვით მეორე ადგილზეა. მან 288 ქულა მოაგროვა; რაც შეეხება გიორგი ბურჯანაძეს, მან ჯამში 231 ქულა მიიღო.
  • სახალხო დამცველობის კანდიდატურა, ასევე, წარდგენილი ჰქონდა დეპუტატ იაგო ხვიჩიასაც, რომელმაც ჯგუფის წევრების შეფასების მიხედვით, 62 ქულა მოაგროვა;

გარდა ამისა, კანონის თანახმად, თუ პარლამენტი ახალ სახალხო დამცველს ვერ აირჩევს, მაშინ მის მოვალეობას ომბუდსმენის პირველი მოადგილე შეასრულებს.