ამის შესახებ ცხოველთა მონიტორინგის სააგენტოს მთავარმა იურისტმა, კახაბერ იოსელიანმა მედიაჰოლდინგ კვირას პრესკლუბში გამართულ ბრიფინგზე ისაუბრა.

რატომ არის მნიშვნელოვანი: ბოლო დროს ძაღლის მიერ ადამიანზე კბენის რამდენიმე შემთხვევა დაფიქსირდა.

  • 23 სექტემბერს პიტბულმა სამი ადამიანი დაკბინა, იმავე ჯიშის ძაღლმა რუსთავში 17 ოქტომბერს 4 ადამიანს უკბინა, ხოლო ხელვაჩაურში ძაღლმა დაზიანებები 5 წლის ბავშვს მიაყენა.

დეტალები: იოსელიანის თქმით, მიმდინარეობს მსჯელობა, თუ რომელი კონკრეტული ჯიშის ძაღლების გამრავლება აიკრძალოს. ასევე, იგეგმება აკრძალვის დაწესება 16 წლამდე ასაკის პირის მიერ აგრესიული ჯიშის ძაღლების გასეირნებაზეც.

  • ამბობს, რომ თუ შეზღუდვა ძალაში შევა, მას უკუძალა არ ექნება და "ვისაც მებრძოლი ჯიშის ძაღლი ჰყავს, არ მოუწევს, ცხოველი დააძინოს ან სხვა ქვეყანაში გაიყვანოს".
  • მისივე ცნობით, ამ ეტაპზე დარგის სპეციალისტებთან ერთად, პარლამენტში კანონპროექტის შემუშავება მიმდინარეობს და მისი განხილვა საშემოდგომო სესიებზეა დაგეგმილი.
  • იურისტის განცხადებით, თბილისში არსებობს რეგულაცია, თუმცა არ არსებობს ნუსხა, თუ რომელი ჯიშის ძაღლია აგრესიული, ხოლო კანონპროექტში ეს ნუსხაც იქნება გაწერილი.
  • "მაგალითად, ბევრჯერ მინახავს, როცა პიტბულის პატრონმა არ იცის, რომ ეს ჯიში აგრესიულია, რადგან მასთან თვინიერად იქცევა, არ კბენს, ჰგონია, რომ ეს ძაღლი მშვიდია".
  • "ახალს არაფერს ვიგონებთ. ასეა ევროკავშირის ქვეყნებში. მაგალითად, პიტბულის ჯიშის ძაღლი. ნორვეგიაში ასეთი ძაღლის ყოლა, გამრავლება, გასხვისება, ქვეყანაში შეყვანა საერთოდ აკრძალულია".

მონიტორინგის სააგენტოს წარმომადგენელი განმარტავს, რომ კანონპროექტით განისაზღვრება ისიც, თუ რა ქმედება ჩაითვლება სისხლის სამართლის დანაშაულად და რა ადმინისტრაციულ სამართალდარღვევად.

  • მისი თქმით, მაგალითად, თუ პირი ცხოველის გასეირნების დროს უსაფრთხოების ნორმებს არღვევს, აგრესიული ჯიშის ძაღლი ჰყავს და ამას ადამიანის ან სხვა ცხოველის ჯანმრთელობის მსუბუქი, ნაკლებად მძიმე, მძიმე ან სიცოცხლის მოსპობა მოჰყვება, ეს სისხლის სამართლის პასუხისმგებლობად კვალიფიცირდება.
  • იოსელიანი ამბობს, რომ კანონპროექტის მიღების შემთხვევაში, აგრესიული ჯიშის ძაღლების გასეირნება მთელი ქვეყნის მასშტაბით გარკვეულ საათებში ალიკაპითა და საბმელით იქნება საჭირო.
  • ასევე, პატრონს თავისუფლად შეეძლება ალიკაპისა და საბმელის გარეშე იმ ძაღლის გასეირნება, რომელიც ნუსხაში არ იქნება.