ამის შესახებ იუსტიციის მინისტრმა რატი ბრეგაძემ იმედის ეთერში ისაუბრა.

რატომ არის მნიშვნელოვანი: 6 ოქტომბერს გავრცელდა ინფორმაცია, რომ უკრაინის სასამართლომ, მიხეილ სააკაშვილის უკრაინისთვის გადაცემის გადაწყვეტილება მიიღო.

  • ადვოკატი შალვა ხაჭაპურიძე პალიტრანიუსის ეთერში ამბობდა, რომ უკრაინის სასამართლოს გადაწყვეტილებას არანაირი კავშირი არ აქვს საქართველოში მიმდინარე საქმეებთან.
  • თუმცა რატი ბრეგაძემ გუშინ, 12 ოქტომბერს აღნიშნა, რომ იუსტიციის სამინისტროში უკრაინის სასამართლოდან სააკაშვილის გადაცემაზე მოთხოვნა არ შესულა.

ბრეგაძის განცხადებით, მოთხოვნის მიღების შემთხვევაშიც კი, ქართულ მხარეს სააკაშვილის უკრაინისთვის გადაცემაზე უარის თქმის სამართლებრივი საფუძველი აქვს.

  • მისი თქმით, სააკაშვილი არის მსჯავრდებული 2 საქმეზე და დანარჩენ 3 საქმეზე მიმდინარეობს სასამართლო პროცესები, რაც უარის თქმის გამოკვეთილი საფუძველია.

არქივიდან: სააკაშვილი, რომელსაც ორ საქმეზე 6-წლიანი პატიმრობა აქვს მისჯილი, საქართველოში 2021 წლის სექტემბრის ბოლოს დაბრუნდა და დააკავეს.

  • სააკაშვილი 12 მაისიდან მკურნალობს კლინიკა ვივამედში. ადვოკატები და ოჯახის წევრები აცხადებენ, რომ ექსპრეზიდენტის ჯანმრთელობის მდგომარეობა გაუარესებულია.
  • 5 ოქტომბერს შალვა ხაჭაპურიძემ თქვა, რომ მიხეილ სააკაშვილი ვერ იღებს საჭმელს და წამლებს, აქვს ტკივილები და ვივამედში გადაყვანის შემდეგ 20 კგ აქვს დაკლებული;
  • ნევროლოგი ოთარ თოიძე კი ამბობდა, რომ მაღალია ინფარქტის, გულის იშემიური დაავადების ან ტვინში სისხლის მიმოქცევის მოშლის განვითარების რისკი.