უკრაინას მტკიცე მხარდაჭერა მათ დღეს, საგანგებო სამიტზე კიდევ ერთხელ გამოუცხადეს.

რატომ არის მნიშვნელოვანი: 10 ოქტომბერს ოკუპანტებმა უკრაინის რამდენიმე ქალაქში მასიური სარაკეტო თავდასხმების განახორციელეს.

  • მთელს ქვეყანაში საჰაერო განგაში არ წყდებოდა და იბომბებოდა უკრაინის მთელი ტერიტორია ოკუპირებული ყირიმის გარდა — სარაკეტო იერიშის სამიზნე გახდა კიევიც.

დეტალები: G7-ის ლიდერებმა განცხადება სამშაბათს გამართული შეხვედრის შემდეგ გააკეთეს და აღნიშნეს, რომ ბოლო თავდასხმების გამო პუტინს და სხვა პასუხისმგებელ პირებს პასუხი მოეთხოვებათ.

  • ისინი აცხადებენ, რომ სადამდეც საჭირო იქნება, გააგრძელებენ უკრაინის მხარდაჭერას, მათ შორის, ფინანსური, ჰუმანიტარული, სამხედრო, დიპლომატიური და სამართლებრივი მიმართულებებით;
  • მათ ხაზი გაუსვეს, რომ მტკიცედ უჭერენ მხარს უკრაინას ყველაფერში, რაც ქვეყანას სუვერენიტეტისა და ტერიტორიული მთლიანობის შესანარჩუნებლად სჭირდება;
  • ასევე, გამოთქვამენ მზადყოფნას, რომ გააგრძელებენ ქვეყანას მხარდაჭერას ზამთრის საჭიროებებისთვის უზრუნველსაყოფად.

რა თქვა ზელენსკიმ: უკრაინის პრეზიდენტმა მათ განუცხადა, რომ რუსეთის მასობრივი თავდასხმების შემდეგ, უკრაინისთვის საჰაერო ფარის შესაქმნელად საერთო ძალისხმევა უნდა გაძლიერდეს.

  • მისი თქმით, ორშაბათის შემდეგ, ოკუპანტებმა უკრაინის წინააღმდეგ 100-ზე მეტი რაკეტა გამოიყენეს და ყოველ 10 წუთში ის იღებს ინფორმაციას ირანული დრონების გამოყენების შესახებ;
  • ზელენსკის განცხადებით, რუსეთმა ირანისგან 2 400 Shaheds-ის ტიპის დრონი შეუკვეთა;
  • ის აღნიშნავს, რომ რუსეთს უკრაინასა და სრულიად დემოკრატიულ მსოფლიოში ქაოსის გამოწვევა უნდა, რისთვისაც ყველაფერს იყენებს — მისივე თქმით, რუსეთს კიდევ აქვს სივრცე მეტი ესკალაციისთვის.

ამასთან, უკრაინის პრეზიდენტმა აღნიშნა, რომ რუსეთი ომში ბელარუსის ჩათრევას ცდილობს.

  • "უკრაინის ტერიტორიის წინააღმდეგ დარტყმებისთვის ბელარუსის ტერიტორია უკვე გამოიყენება. ახლა, უფრო დიდ საფრთხეს ვხედავთ. რუსეთის ცდილობს, რომ ბელარუსი ომში პირდაპირ ჩართოს, იგონებს პროვოკაციას, რომ ჩვენ, თითქოს, ამ ქვეყანაზე თავდასხმას ვამზადებთ";
  • ვოლოდიმირ ზელენსკიმ კიდევ ერთხელ გაიმეორა, რომ რუსეთის ამჟამინდელ ლიდერთან, რომელსაც მომავალი არ აქვს, დიალოგი არ შედგება.