პროკურატურამ თელავში ცოლის მიმართ დამამძიმებელ გარემოებაში ჩადენილი განზრახ მკვლელობის და შემაკავებელი ორდერით გათვალისწინებული მოთხოვნების და ვალდებულებების შეუსრულებლობის ფაქტზე, ერთ პირს ბრალი წარუდგინა.

რატომ არის მნიშვნელოვანი: უწყების განცხადებით, ბრალდებული სიტყვიერ შეურაცხყოფას აყენებდა დაზარალებულს, ასევე ფიზიკურად იძალადა ცოლსა და მის დედაზე და სიცოცხლის მოსპობით დაემუქრა ქალს.

• კაცი შსს-მ 4 ოქტომბერს დააკავა და პროკურატურამ მას ბრალდება ოჯახის წევრის მიმართ ძალადობისა და მუქარის მუხლით წაუყენა, აღკვეთის ღონისძიების სახით კი პატიმრობის შეფარდება მოითხოვა.
• პროკურატურა განმარტავს, რომ თელავის რაიონული სასამართლოს მოსამართლემ, მიუხედავად იმისა, რომ დაზარალებული პირდაპირ მიუთითებდა ბრალდებულის მხრიდან სიცოცხლის მოსპობის მუქარის თაობაზე, არ გაიზიარა პროკურატურის პოზიცია.
• "სათანადოდ ვერ შეაფასა ბრალდებულიდან მომდინარე რისკები და საფრთხეები, მათ შორის ახალი დანაშაულის ჩადენისა და მისი მიმალვის საფრთხე, უკანონოდ ცნო ბრალდებულის დაკავება".
• ბრალდებულს აღკვეთის ღონისძიების სახით გირაო — 2000 ლარი შეეფარდა.

პროკურატურის განცხადებით, სასამართლოს გადაწყვეტილების შემდეგ მათ თბილისის სააპელაციო სასამართლოს საჩივრით მიმართეს.

• "ბრალდებულს, რომელსაც არ შეეფარდა პატიმრობა, მიეცა შესაძლებლობა სისრულეში მოეყვანა თავისი მუქარა და სასტიკად გაუსწორდა თავის მეუღლეს, რამაც უმძიმესი შედეგი გამოიწვია".

9 ოქტომბერს ცნობილი გახდა, რომ კაცმა, რომელიც სასამართლოს გირაოთი ჰყავდა გათავისუფლებული კახეთში ცოლი მოკლა.

• მას ბრალი საქართველოს სისხლის სამართლის კოდექსის 11 პრიმა 109-ე მუხლის "კ" ქვეპუნქტით პირველი ნაწილით (განზრახ მკვლელობას დამამძიმებელ გარემოებაში, ჩადენილი ოჯახის წევრის მიმართ) და 11 პრიმა 381 პრიმა მუხლის პირველი ნაწილით (შემაკავებელი ორდერით გათვალისწინებული მოთხოვნებისა და ვალდებულებების შეუსრულებლობა) წარედგინა.
• დანაშაული სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.
• პროკურატურა ბრალდებულის მიმართ აღკვეთის ღონისძიების სახით პატიმრობის გამოყენების შუამდგომლობით მიმართავს.

ფემიციდი გენდერული ნიშნით ქალთა მკვლელობაა. უფლებადამცველები არაერთი წელია ითხოვენ კანონში ფემიციდის დეფინიციის ჩაწერას.

• ევროკომისიის რეკომენდაციების შემდეგ ქალთა მოძრაობამ პარლამენტს მიმართა და მოითხოვა, რომ ქალზე და ოჯახში ძალადობაზე კანონს ფემიციდის განმარტება დაემატოს.

მნიშვნელოვანია ვიცოდეთ, რომ ოჯახში ძალადობა არ გულისხმობს მხოლოდ ფიზიკურ შეხებას. ოჯახის წევრის მხრიდან ფსიქოლოგიური ზეწოლა, მუქარა, შანტაჟი, სიტყვიერი შეურაცხყოფა ასევე ძალადობაა და კანონით აკრძალულია.

• ოჯახში ძალადობის შემთხვევაში პოლიციის გამოძახება შესაძლებელია 112-ზე დარეკვით. ზარი უფასოა.
• საკონსულტაციო მომსახურების გაწევის მიზნით ფუნქციონირებს ცხელი ხაზი — 116 006.

საჭიროების შემთხვევაში შეგიძლიათ დარეკოთ შემდეგ ნომრებზე:

• საფარის უფასო იურიდიული დახმარება — 0322 30 76 03; 599 40 76 03;
• სახალხო დამცველის ცხელი ხაზი — 1481.