ორგანიზაცია სასულიერო პირების, მათ შორის მეუფე მალხაზ სონღულაშვილის, მეუფე რუსუდან გოცირიძის, დედა სიდონიას, დეკანოზ გიორგი მამალაძის, ასევე, სამოქალაქო აქტივისტებისა და თავად ცენტრის თანამშრომლების ინტერესებს იცავს.

რატომ არის მნიშვნელოვანი: 2021 წლის 13-14 სექტემბერს, სავარაუდოდ, სახელმწიფო უსაფრთხოების სამსახურიდან უკანონო ფარული მოსმენა-მიყურადებისა და თვალთვალის, დაახლოებით, 58 000-მდე ფაილი გავრცელდა.

• ე.წ. კრებსები ჟურნალისტების, რელიგიური ორგანიზაციების წარმომადგენლების, პოლიტიკოსების, სამოქალაქო აქტივისტებისა და დიპლომატების კერძო კომუნიკაციის ჩანაწერებსა და პირადი ცხოვრების დეტალურად დამუშავებულ ინფორმაციას მოიცავდა.
• ჩანაწერების ავთენტურობა უკვე არაერთმა ადამიანმა დაადასტურა.

დეტალები: ცენტრი მიუთითებს, რომ სასულიერო პირები პროკურატურამ დაზარალებულად მხოლოდ გამოძიების დაწყებიდან ერთი წლის შემდეგ ცნო და ორგანიზაციას სისხლის სამართლის საქმის მასალების მხოლოდ ნაწილის გაცნობის შესაძლებლობა მისცა.

• "სტატუსის მონიჭების შემდეგ პროკურატურამ სრულიად დაუსაბუთებლად უარი გვითხრა საქმის მასალების გადმოცემაზე და მხოლოდ საქმის მასალების არასაიდუმლო ნაწილის გაცნობის შესაძლებლობა მოგვცა ადგილზე".
• მათივე თქმით სუს-მა თითქმის სრულად დაშტრიხა უსაფრთხოების სამსახურების თანამშრომლებიც გამოკითხვის ოქმები.

მათივე თქმით, საქმის მასალების გაცნობის შემდეგ, მიუხედავად იმისა, რომ პროკურატურამ გამოძიება პირველივე თვეებში ჩაატარა, ნათელი გახდა, რომ რიგი საგამოძიებო და საპროცესო მოქმედებები არ ჩატარებულა.

• ასევე, სუს-ის თანამშრომლების გამოკითხვისას ყურადღება არ არის გამახვილებული გამოძიებისთვის კრიტიკული მნიშვნელობის საკითხებზე.

ხარვეზები: ორგანიზაცია რამდენიმე გარემოებას უსვამს ხაზს. კერძოდ, ამბობენ, რომ არ არიან გამოკითხული სუს-ის მაღალჩინოსნები, ოპერატიულ-ტექნიკური სააგენტოს (ოტოს) თანამშრომლები.

• ასევე, არც სააგენტოს მუშაობის შიდა მექანიზმები და ინსტრუქციებია შემოწმებული, სუს-ის დანარჩენი თანამშრომლების გამოკითხვა კი ხარვეზიანი და ფორმალურია.
• "ისინი ხშირად სახელმწიფო საიდუმლოების დაცვის სახელით გამოძიების ფუნდამენტურ კითხვებს არ სცემენ პასუხს".
• "მათთვის დასმული კითხვებიც კი მხოლოდ სამსახურებრივ ჩატში კომუნიკაციას არ უკავშირდებოდა და არა უფრო ფართოდ, კრებსებში წარმოდგენილ სხვა შინაარსებზე და შესაძლო დარღვევებზე".

გარდა ამისა, განცხადებაში ნათქვამია, რომ ამ დრომდე არ არის შემოწმებული ის სამართლებრივი საფუძვლები, რომლითაც სასულიერო პირების მოსმენა ხორციელდებოდა.

• ხაზს უსვამენ იმასაც, რომ მთელი რიგი საგამოძიებო მოქმედებები, მაგალითად ტელეფონებისა და სამსახურებრივი კომპიუტერების ჩხრეკა და ამოღება დაგვიანებით ჩატარდა.

ცენტრის შეფასებით, აღნიშნული გარემოებები მიუთითებს, რომ არაერთი პირის კერძო კომუნიკაციისა და მათი პირადი ცხოვრების საიდუმლოების დარღვევის ფაქტზე მიმდინარე გამოძიება გარკვეული ხარვეზებით მიმდინარეობს.

• ამბობენ, რომ ჩატარებული მოქმედებების ნაწილი ფორმალურია და ნაკლებად მოსალოდნელია, რომ შედეგმა გამოძიების მიმდინარეობაზე არსებითი გავლენა მოახდინოს.
• ორგანიზაცია მოუწოდებს პროკურატურას, უზრუნველყოს ობიექტური გამოძიების ჩატარება და დაიცვას დაზარალებულების სამართლებრივი ინტერესები.
• მათივე თქმით, ცენტრი აგრძელებს ბენეფიციარების ინტერესების დაცვასა და ახლო მომავალში პროკურატურას დამატებით მოქმედებების ჩატარების შესახებ შუამდგომლობებს წარუდგენს.