საქართველოს უძრავმა ქონებამ (m2-ის მფლობელი კომპანია) წარმატებით გამოუშვა და განათავსა $35 მილიონის 2-წლიანი ობლიგაციები. აღნიშნული ტრანზაქცია საქართველოს უძრავი ქონებისა და გალტ & თაგარტისთვის რიგით მეშვიდე, ხოლო საქართველოს უძრავი ქონებისა და თიბისი კაპიტალისთვის პირველი ერთობლივი წარმატებული განთავსებაა, რაც საქართველოს კაპიტალის ბაზრის განვითარებას უწყობს ხელს. ამასთან, ეს ემისია თიბისი კაპიტალის და გალტ & თაგარტის რიგით მეორე ერთობლივი განთავსებაა ადგილობრივ ბაზარზე.

პანდემიისა და რუსეთ-უკრაინის ომის პირობებში წარმატებით შესრულებული განთავსება საქართველოს უძრავი ქონების სტაბილურობაზე, ინვესტორების მხრიდან ნდობის მაღალ ხარისხსა და კომპანიის მიმართ დადებით მოლოდინებზე მიუთითებს.

აღნიშნული ობლიგაციების წლიური ფიქსირებული განაკვეთი 8.5%-ს შეადგენს. დაფარვის ვადა 2 წელია და ის 2024 წლის 7 ოქტომბერს დასრულდება. ტრანზაქციის განთავსების აგენტები გალტ & თაგარტი და თიბისი კაპიტალი არიან.

"მოხარული ვართ, რომ საქართველოს უძრავმა ქონებამ ადგილობრივ ბაზარზე კიდევ ერთხელ წარმატებით განათავსა ობლიგაციები", — აცხადებს საქართველოს უძრავი ქონების გენერალური დირექტორი, გურამ ახვლედიანი, — "აღნიშნულ ფასიან ქაღალდებზე მოთხოვნამ ჩვენი მოლოდინი გაამართლა, რაც ძალიან სასიხარულოა. ეს წარმატება ჩვენი კომპანიის ძალიან მაღალ სანდოობასა და გალტ & თაგარტისა და თიბისი კაპიტალის პროფესიონალიზმზე მეტყველებს".

წარმატებული პრეცედენტის შექმნაზე საუბრობს გალტ & თაგარტის მმართველი დირექტორი, ოთარ შარიქაძეც.

"მოხარული ვარ, აღვნიშნო გალტ & თაგარტის როლი საქართველოს უძრავი ქონების ობლიგაციების განთავსებაში", — ამბობს შარიქაძე, — "მორიგი წარმატებული განთავსება მეტყველებს, როგორც საქართველოს უძრავი ქონების სანდოობაზე, ისე, ზოგადად, საქართველოში მსგავს ტრანზაქციებზე ინვესტორების მხრიდან ნდობის ზრდაზე. მსურს, ჩვენს კოლეგებთან ერთად, მორიგი წარმატება მივულოცო გალტ & თაგარტის მთელ გუნდს. გალტ & თაგარტი საქართველოს ბაზარზე წლებია, საინვესტიციო ბანკის როლში ეფექტურად თანამშრომლობს, როგორც კერძო და საჯარო სექტორის სხვადასხვა წარმომადგენელთან, ასევე საერთაშორისო საფინანსო ინსტიტუტებთან".

თიბისი კაპიტალის მმართველი დირექტორი, მერი ჩაჩანიძე, ამბობს, რომ ობლიგაციების წარმატებით განთავსება ადგილობრივი ბაზრის განვითარებისთვის მეტად მნიშვნელოვანი მოვლენაა.

"მოხარული ვართ, რომ საქართველოს უძრავ ქონებასთან ერთად, პირველი ერთობლივი ემისია წარმატებით განვახორციელეთ და კომპანიას, კაპიტალის ბაზრის დახმარებით, დაფინანსების ალტერნატიული წყაროების მოძიებაში შევუწყეთ ხელი", — აღნიშნავს ჩაჩანიძე, — "ეს ადგილობრივი კაპიტალის ბაზრის განვითარებაში კიდევ ერთი წინგადადგმული ნაბიჯია. მნიშვნელოვანია, რომ ადგილობრივი ობლიგაციების განთავსებაში აქტიურად ვართ ჩართული, რითიც ხელს ვუწყობთ, რომ საქართველო, როგორც ადგილობრივი, ისე უცხოური კაპიტალისთვის მიმზიდველი ქვეყანა იყოს".