როგორც ეხო კავკაზა იუწყება, ამის შესახებ რუსეთის საგამოძიებო კომიტეტის თავმჯდომარემ, ალექსანდრ ბასტრიკინმა ვლადიმერ პუტინთან შეხვედრაზე განაცხადა.

რატომ არის მნიშვნელოვანი: რუსეთიდან ყირიმამდე თითქმის 19 კილომეტრიანი ხიდი კრემლის ოკუპაციის ერთგვარი სიმბოლოა. ის 2018 წელს ნახევარკუნძულის ანექსიის გამოცხადებიდან 4 წელში გახსნეს.

  • ქერჩის ხიდი ერთ-ერთი საკვანძო გზაა, რითაც ოკუპანტებს სამხედრო ტექნიკა და ტვირთი გადააქვთ.
  • ხიდის დაზიანების გამო, რუსეთს უკრაინის სამხრეთში მხოლოდ ერთი სარკინიგზო მომარაგების ხაზი რჩება — მელიტოპოლიდან.

დეტალები: "ჩვენ უკვე დავადგინეთ იმ სატვირთო მანქანის მარშრუტი, რომელიც აფეთქების ადგილას იყო. ეს არის ბულგარეთი, ეს არის საქართველო, ეს არის სომხეთი, ჩრდილოეთ ოსეთი, კრასნოდარის ტერიტორია“, — თქვა ბასტრიკინმა.

  • მარშრუტი უცნაურად გამოიყურება: მაგალითისთვის, ბულგარეთიდან საქართველოში მოსახვედრად სატვირთო მანქანას თურქეთი უნდა გაევლო.
  • ასევე, გაურკვეველია, როგორ შეიძლებოდა მანქანა სომხეთიდან, რომელიც რუსეთს არ ესაზღვრება, რუსეთის ჩრდილოეთ ოსეთის რესპუბლიკაში ჩასულიყო.

რა მოხდა: როგორც ვიდეოებიდან ჩანს, ხიდზე იყო ძლიერი აფეთქება, რომლის გამომწვევი ოფიციალური მიზეზი დადასტურებული არ არის.

  • რუსეთის ოფიციალურმა პირებმა თქვეს, რომ აფეთქდა საწვავის სატვირთო მანქანა. თუმცა დაზიანება მასშტაბური იყო — ყირიმის მიმართულებით გზის გადასასვლელის ორი მონაკვეთი ჩამოინგრა.
  • ცეცხლი გაუჩნდა სატვირთო მატარებელსაც.
  • როგორც BBC-ს რუსული ბიურო ექსპერტებზე დაყრდნობით წერს, ამ მასშტაბის დაზიანებას დიდი რაოდენობით ასაფეთქებელი საშუალება დასჭირდებოდა.

რუსეთი: კრემლს სურს, ყირიმის ხიდზე მომხდარი აფეთქება გამოიძიოს. პრეზიდენტმა ვლადიმერ პუტინმა ბრძანება გასცა, შეიქმნას სამთავრობო კომისია საგანგებო სიტუაციის მიზეზების დადგენისა და შედეგების აღმოსაფხვრელად.

  • ოკუპანტი ქვეყნის პრეზიდენტის თქმით, "ეჭვგარეშეა", რომ ეს ტერორისტული აქტია.