ამის შესახებ დიდი ბრიტანეთის თავდაცვის სამინისტროს დაზვერვის სამსახურის ყოველდღიურ განცხადებაშია ნათქვამი.

რატომ არის მნიშვნელოვანი: 21 სექტემბერს პუტინმა რუსეთში მობილიზაცია გამოაცხადა — ამტკიცებდა, რომ ნაწილობრივი იყო და არა საყოველთაო, მხოლოდ სამხედრო გამოცდილების მქონე პირებს შეეხებოდათ, თუმცა ვრცელდება ინფორმაციები, რომ მიჰყავთ ყველა, ვისაც აგნებენ.

  • როგორც CNN წერდა, მობილიზაციის წინააღმდეგ საპროტესტო აქციაზე მოსახლეობა აცხადებდა, რომ გაიწვიეს სტუდენტები, მამები და კაცები, რომელთა ასაკი არ შეესაბამება სამხედრო სამსახურში ყოფნას.
  • ამის გამო რუსეთის მოქალაქეები ქვეყნიდან გარბიან — საზღვრებთან, მათ შორის, საქართველოში, რამდენიმეკილომეტრიანი რიგები იყო და ათასობით რუსი შემოდიოდა.

დეტალები: მიუთითებენ, რომ მობილიზაციის გამოცხადების შემდეგ პუტინმა შეცდომები უჩვეულოდ სწრაფად, პირველივე კვირაში აღიარა.

  • უწყების თქმით, პუტინმა განაცხადა, რომ სამობილიზაციო კამპანიის ფარგლებში "ბევრი კითხვა ჩნდება, შეცდომები დროულად უნდა გამოსწორდეს და ეს აღარ უნდა განმეორდეს".

გარდა ამისა, დაზვერვა ვარაუდობს, რომ ადგილობრივი ოფიციალური პირებისთვის გაუგებარია კამპანიის ზუსტი მასშტაბი და სამართლებრივი საფუძველი.

  • უწყება თითქმის დადასტურებით ამბობს, რომ მობილიზაციის ფარგლებში გამოიძახეს პერსონალი, რომელიც პუტინისა და თავდაცვის სამინისტროს განმარტებებს სცილდება.
  • დაზვერვა აღნიშნავს იმასაც, რომ რეზერვისტები სატრანზიტო ბანაკებში შეკრებას აგრძელებენ, რუს ოფიციალურ პირებს კი წვრთნების უზრუნველყოფა და იმ ახალი ოფიცრების პოვნა უჭირთ, რომლებიც ახალ დანაყოფებს უხელმძღვანელებენ.