აშშ-ის ელჩის საქართველოში, კელი დეგნანის განცხადებით, ქართული ოცნების თავმჯდომარის, ირაკლი კობახიძის კომენტარი Credit Suisse-სა და ბიძინა ივანიშვილთან დაკავშირებით, ძალიან დამაბნეველი იყო. მისი თქმით, ახლა ერთიანობის დროა და არა საზოგადოების დაყოფის.

"ეს კომენტარი ძალიან დამაბნეველი იყო და ვფიქრობ, ასეთი კომენტარები, რომლებსაც არ აქვს ფაქტების საფუძველი და ნათქვამია ისე, რომ საზოგადოებაში დაბნეულობა გამოიწვიოს, არ არის სასარგებლო. ეს არის დეზინფორმაციის მსგავსი, რომელიც დაბნეულობას იწვევს და ადამიანებს ჰყოფს. დღეს დროა, რომ ქართველები უფრო გაერთიანდნენ და არა დაიყონ. ახლა ერთიანობის დროა, ამიტომ ჩემთვის ნამდვილად გაურკვეველი იყო, რას ეხებოდა კომენტარი", — აღნიშნა მან.

10 მაისს კობახიძემ განაცხადა, რომ როცა კონკრეტული შვეიცარიული ბანკი ერთი თვის განმავლობაში თანხის გადარიცხვას აფერხებს, ეს დამატებით კითხვებს აჩენს. მისივე თქმით, თუ ვინმეს ბიძინა ივანიშვილის პოლიტიკაში მობრუნება და ომში ჩართვა უნდა, მმართველი პარტიის დამფუძნებელს "კარად არ იცნობს".

ბიძინა ივანიშვილი Credit Suisse-ის მიერ დანიშნულ რწმუნებულს — Green Vals Trust-ს გერნსის სასამართლოში უჩივის. ამის შესახებ საქართველოს ყოფილი პრემიერმინისტრის მიერ დაქირავებული PR კომპანია, Cision-ი წერს.

Cision-ი შვეიცარიული ბანკის მიერ დანიშნულ რწმუნებულს — Green Vals Trust-ს ბენეფიციარების აქტივების მართვასთან დაკავშირებით ვალდებულებების სერიოზულ დარღვევასა და მისი კლიენტის კანონიერი ინტერესების უგულებელყოფაში ადანაშაულებს.

Cision-ის მიერ გავრცელებულ ინფორმაციაში წერია, რომ კომპანიის ბენეფიციარებმა Credit Suisse-ს რამდენჯერმე გაუგზავნეს წერილი, სადაც რწმუნებულის მხრიდან დარღვევებზე საუბრობდნენ.

როგორც ირკვევა, Credit suisse-ის მხრიდან დაზარალებულებმა თანხის გაცემა 2022 წლის 4 მარტს მოითხოვეს, რომელზეც თანხმობა რწმუნებულმა კომპანიამ მიმდინარე წლის 4 აპრილს გასცა. Cision-ის მტკიცებით, ამან მის კლიენტებს ფინანსური ზარალი მიაყენა.